Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER III
 

(Versiculus)

89 (Intellectus n Ethan Ezrahitæ.) Misericordias Domini in æternum cantabo. In generationem et generationem annuntiabo veritatem tuam in ore meo ;

Eruditionis Aethan Ezraitae. Misericordias Domini in aeternum cantabo in generatione et generatione adnuntiabo veritatem tuam in ore meo.

2 Quoniam dixisti : In æternum misericordia ædificabitur in cælis ; præparabitur veritas tua in eis.

Quia dixisti sempiterna misericordia aedificabitur caelos fundabis et veritas tua in eis.

3 Disposui testamentum electis meis ; juravi David servo meo :

Percussi foedus cum electo meo iuravi David servo meo.

4 Usque in æternum præparabo semen tuum. Et ædificabo in generationem et generationem sedem tuam.

Usque in aeternum stabiliam semen tuum et aedificabo in generationem et generationem thronum tuum semper.

5 Confitebuntur cæli mirabilia tua, Domine ; etenim veritatem tuam in ecclesia sanctorum.

Confitebuntur caeli mirabilia tua Domine et veritatem tuam in ecclesia sanctorum.

6 Quoniam quis in nubibus æquabitur Domino ? similis erit Deo in filiis Dei ?

Quis enim in nubibus adaequabitur Domino adsimilabitur Domino de filiis Dei.

7 Deus, qui glorificatur in consilio sanctorum, magnus et terribilis super omnes qui in circuitu ejus sunt.

Deus inclitus in arcano sanctorum nimio et terribilis in cunctis qui circum eum sunt.

8 Domine, Deus virtutum, quis similis tibi ? Potens es, Domine, et veritas tua in circuitu tuo.

Domine Deus exercituum quis similis tui fortissime Domine et veritas tua in circuitu tuo.

9 Tu dominaris potestati maris, motum autem fluctuum ejus tu mitigas.

Tu dominaris superbiae maris et elationes gurgitum eius tu conprimis.

10 Tu humiliasti, sicut vulneratum, superbum ; in brachio virtutis tuæ dispersisti inimicos tuos.

Tu confregisti quasi vulneratum superbum in brachio forti tuo dispersisti inimicos tuos.

11 Tui sunt cæli, et tua est terra ; orbem terræ et plenitudinem ejus tu fundasti ;

Tui sunt caeli et tua est terra orbem et plenitudinem eius tu fundasti.

12 Aquilonem et mare tu creasti. Thabor et Hermon in nomine tuo exsultabunt ;

Aquilonem et dexteram tu creasti Thabor et Hermon nomen tuum laudabunt.

13 Tuum brachium cum potentia. Firmetur manus tua, et exaltetur dextera tua !

Tuum brachium cum fortitudine roboretur manus tua exaltetur dextera tua.

14 Justitia et judicium præparatio sedis tuæ. Misericordia et veritas præcedent faciem tuam.

Iustitia et iudicium firmamentum throni tui misericordia et veritas praecedent faciem tuam.

15 Beatus populus qui scit jubilationem ! Domine, in lumine vultus tui ambulabunt ;

Beatus populus qui novit iubilum Domine in lumine vultus tui ambulabunt.

16 Et in nomine tuo exsultabunt tota die ; et in justitia tua exaltabuntur.

In nomine tuo exultabunt tota die et in iustitia tua exaltabuntur.

17 Quoniam gloria virtutis eorum tu es, et in beneplacito tuo exaltabitur cornu nostrum.

Quia gloria fortitudinis eorum tu es et in misericordia tua elevabis cornu nostrum.

18 Quia Domini est assumptio nostra, et sancti Israel regis nostri.

Quia a Domino est protectio nostra et a Sancto Israhel rege nostro.

19 Tunc locutus es in visione sanctis tuis, et dixisti : Posui adjutorium in potente ; et exaltavi electum de plebe mea.

Tunc locutus es per visionem sanctis tuis et dixisti posui adiutorium super robustum exaltavi electum de populo.

20 Inveni David, servum meum, oleo sancto meo unxi eum.

Inveni David servum meum oleo sancto meo unxi eum.

21 Manus enim mea auxiliabitur ei, et brachium meum confortabit eum.

Cum quo manus mea firma erit et brachium meum roborabit eum.

22 Nihil proficiet inimicus in eo, et filius iniquitatis non apponet nocere ei.

Non decipiet inimicus eum et filius iniquitatis non adfliget eum.

23 Et concidam a facie ipsius inimicos ejus ; et odientes eum in fugam convertam.

Sed concidam ante faciem eius hostes illius et qui eum oderunt percutiam.

24 Et veritas mea et misericordia mea cum ipso ; et in nomine meo exaltabitur cornu ejus.

Veritas autem mea et misericordia mea erit cum eo et in nomine meo exaltabitur cornu eius.

25 Et ponam in mari manum ejus, et in fluminibus dexteram ejus.

Et ponam in mari manum eius et in fluminibus dexteram eius.

26 Ipse invocabit me : Pater meus es tu, Deus meus, et susceptor salutis meæ.

Ipse vocabit me pater meus es tu Deus meus et fortitudo salutis meae.

27 Et ego primogenitum ponam illum excelsum præ regibus terræ.

Ego autem primogenitum ponam eum excelsum regibus terrae.

28 In æternum servabo illi misericordiam meam ; et testamentum meum fidele ipsi.

In aeternum custodiam ei misericordiam meam et pactum meum fidele ei erit.

29 Et ponam in seculum seculi semen ejus, et thronum ejus sicut dies cæli.

Et ponam perpetuum semen eius et thronum eius sicut dies caeli.

30 Si autem dereliquerint filii ejus legem meam, et in judiciis meis non ambulaverint ;

Si autem dereliquerint filii eius legem meam et in iudiciis meis non ambulaverint.

31 Si justitias meas profanaverint, et mandata mea non custodierint ;

Si caerimonias meas profanaverint et praecepta mea non custodierint.

32 Visitabo in virga iniquitates eorum, et in verberibus peccata eorum ;

Visitabo in virga scelera eorum et in plagis iniquitatem eorum.

33 Misericordiam autem meam non dispergam ab eo, neque nocebo in veritate mea,

Misericordiam autem meam non auferam ab eo nec mentiar in veritate mea.

34 Neque profanabo testamentum meum ; et quæ procedunt de labiis meis non faciam irrita.

Non violabo pactum meum et quod egressum est de labiis meis non mutabo.

35 Semel juravi in sancto meo, si David mentiar ;

Semel iuravi in sancto meo ne David mentiar.

36 Semen ejus in æternum manebit.

Semen eius in sempiternum erit.

37 Et thronus ejus sicut sol in conspectu meo, et sicut luna perfecta in æternum, et testis in cælo fidelis.

Et thronus eius sicut sol in conspectu meo sicut luna stabilietur in sempiternum et testis in caelo fidelis semper.

38 Tu vero repulisti et despexisti ; distulisti christum tuum.

Tu autem reppulisti et proiecisti iratus es adversum christum tuum.

39 Evertisti testamentum servi tui ; profanasti in terra sanctuarium ejus.

Adtenuasti pactum servi tui profanasti in terra diadema eius.

40 Destruxisti omnes sepes ejus ; posuisti firmamentum ejus formidinem.

Dissipasti omnes macerias eius posuisti munitiones eius pavorem.

41 Diripuerunt eum omnes transeuntes viam ; factus est opprobrium vicinis suis.

Diripuerunt eum omnes qui transeunt per viam factus est obprobrium vicinis suis.

42 Exaltasti dexteram deprimentium eum ; lætificasti omnes inimicos ejus.

Elevasti dexteram hostium eius laetificasti omnes inimicos illius.

43 Avertisti adjutorium gladii ejus, et non es auxiliatus ei in bello.

Avertisti robur gladii eius et non sublevasti eum in proelio.

44 Destruxisti eum ab emundatione, et sedem ejus in terram collisisti.

Quiescere fecisti munditiam eius et thronum illius in terram detraxisti.

45 Minorasti dies temporis ejus ; perfudisti eum confusione.

Adbreviasti dies adulescentiae eius operuisti eum ignominia sempiterna.

46 Usquequo, Domine, avertis in finem ? exardescet sicut ignis ira tua ?

Usquequo Domine absconderis in finem succendetur quasi ignis indignatio tua.

47 Memorare quæ mea substantia ; numquid enim vane constituisti omnes filios hominum ?

Memento mei de profundo alioquin quare frustra creasti filios hominum.

48 Quis est homo qui vivet et non videbit mortem ? eruet animam suam de manu inferi ?

Quis est vir qui vivat et non videat mortem salvans animam suam de manu inferi semper.

49 Ubi sunt misericordiæ tuæ antiquæ, Domine, sicut jurasti David in veritate tua ?

Ubi sunt misericordiae tuae antiquae Domine quas iurasti David in veritate tua.

50 Memor esto, Domine, opprobrii servorum tuorum, quod continui in sinu meo, multarum gentium ;

Recordare Domine obprobrii servorum tuorum quia portavi in sinu meo omnes iniquitates populorum.

51 Quod exprobraverunt inimici tui, Domine, quod exprobraverunt commutationem Christi tui.

Quas exprobraverunt inimici tui Domine quibus exprobraverunt vestigia christi tui.

52 Benedictus Dominus in æternum ! Fiat ! fiat !

Benedictus Dominus in sempiternum amen et amen.



Hieronymus Vulgata - Vide psalmum 88. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 88. || Nova Vulgata Bibliorum Sacrorum Editio.

spacer 


Aperit