80 (In finem, n pro iis qui commutabuntur, testimonium Asaph. Psalmus.) Qui regis Israel, intende ; qui deducis velut ovem Joseph. Qui sedes super cherubim, manifestare
Victori pro liliis testimonii Asaph canticum. Qui pascis Israhel ausculta qui ducis quasi gregem Ioseph qui sedes super cherubin ostendere.
2 Coram Ephraim, Benjamin, et Manasse. Excita potentiam tuam, et veni, ut salvos facias nos.
Ante Efraim et Beniamin et Manasse suscita fortitudinem tuam et veni ut salvos facias nos.
3 Deus, converte nos, et ostende faciem tuam, et salvi erimus.
Deus converte nos et ostende faciem tuam et salvi erimus.
4 Domine, Deus virtutum, quousque irasceris super orationem servi tui ?
Domine Deus exercituum usquequo fumabis ad orationem populi tui.
5 Cibabis nos pane lacrymarum, et potum dabis nobis in lacrymis in mensura ?
Cibasti nos pane flebili et potasti nos in lacrimis tripliciter.
6 Posuisti nos in contradictionem vicinis nostris, et inimici nostri subsannaverunt nos.
Posuisti nos contentionem vicinis nostris et inimici nostri subsannaverunt nos.
7 Deus virtutum, converte nos, et ostende faciem tuam, et salvi erimus.
Deus exercituum converte nos et ostende faciem tuam et salvi erimus.
8 Vineam de Ægypto transtulisti, ejecisti gentes, et plantasti eam.
Vineam de Aegypto tulisti eiecisti gentes et plantasti eam.
9 Dux itineris fuisti in conspectu ejus ; plantasti radices ejus, et implevit terram.
Praeparasti ante faciem eius et stabilisti radices eius et implevit terram.
10 Operuit montes umbra ejus, et arbusta ejus cedros Dei.
Operti sunt montes umbra eius et ramis illius cedri Dei.
11 Extendit palmites suos usque ad mare, et usque ad flumen propagines ejus.
Expandit comas suas usque ad mare et usque ad Flumen germina sua.
12 Ut quid destruxisti maceriam ejus ? et vindemiant eam omnes qui prætergrediuntur viam ?
Quare dissipasti maceriam eius et vindemiaverunt eam omnes qui transeunt per viam.
13 Exterminavit eam aper de silva ; et singularis ferus depastus est eam.
Vastavit eam aper de silva et omnes bestiae agri depastae sunt eam.
14 Deus virtutum, convertere ; respice de cælo, et vide ; et visita vineam istam.
Deus exercituum revertere obsecro respice de caelo et vide et visita vineam hanc.
15 Et perfice eam quam plantavit dextera tua ; et super filium hominis quem confirmasti tibi.
Et radicem quam plantavit dextera tua et filium quem confirmasti tibi.
16 Incensa igni, et suffossa, ab increpatione vultus tui peribunt.
Succensam igni et deramatam ab increpatione faciei tuae pereant.
17 Fiat manus tua super virum dexteræ tuæ, et super filium hominis quem confirmasti tibi.
Fiat manus tua super virum dexterae tuae et super filium hominis quem confirmasti tibi.
18 Et non discedimus a te ; vivificabis nos ; et nomen tuum invocabimus.
Et non recedemus a te vivificabis nos et nomine tuo vocabimur.
19 Domine, Deus virtutum, converte nos, et ostende faciem tuam, et salvi erimus.
Domine Deus exercituum converte nos et ostende faciem tuam et salvi erimus.
Hieronymus Vulgata - Vide psalmum 79. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 79. || Nova Vulgata Bibliorum Sacrorum Editio.