79 (Psalmus Asaph.) Deus, venerunt gentes in hæreditatem tuam ; polluerunt templum sanctum tuum ; posuerunt Jerusalem in pomorum custodiam.
Canticum Asaph. Deus venerunt gentes in hereditatem tuam polluerunt templum sanctum tuum posuerunt Hierusalem in acervis lapidum.
2 Posuerunt morticina servorum tuorum, escas volatilibus cæli ; carnes sanctorum tuorum bestiis terræ.
Dederunt cadavera servorum tuorum escam volatilibus caeli carnes sanctorum tuorum bestiis terrae.
3 Effuderunt sanguinem eorum tanquam aquam in circuitu Jerusalem ; et non erat qui sepeliret.
Effuderunt sanguinem eorum quasi aquam in circuitu Hierusalem et non erat qui sepeliret.
4 Facti sumus opprobrium vicinis nostris ; subsannatio et illusio his qui in circuitu nostro sunt.
Facti sumus obprobrium vicinis nostris subsannatio et derisio his qui in circuitu nostro sunt.
5 Usquequo, Domine, irasceris in finem ? accendetur velut ignis zelus tuus ?
Usquequo Domine irasceris in finem ardebit quasi ignis zelus tuus.
6 Effunde iram tuam in gentes quæ te non noverunt, et in regna quæ nomen tuum non invocaverunt,
Effunde furorem tuum super gentes quae non cognoverunt te et super regna quae nomen tuum non invocaverunt.
7 Quia comederunt Jacob, et locum ejus desolaverunt.
Quia comederunt Iacob et decorem eius desolaverunt.
8 Ne memineris iniquitatum nostrarum antiquarum ; cito anticipent nos misericordiæ tuæ, quia pauperes facti sumus nimis.
Ne recorderis iniquitatum nostrarum veterum cito occupent nos misericordiae tuae quia adtenuati sumus nimis.
9 Adjuva nos, Deus salutaris noster ; et propter gloriam nominis tui, Domine, libera nos, et propitius esto peccatis nostris, propter nomen tuum.
Auxiliare nobis Deus Iesus noster propter gloriam nominis tui et libera nos et propitiare peccatis nostris propter nomen tuum.
10 Ne forte dicant in gentibus : Ubi est Deus eorum ? Et innotescat in nationibus coram oculis nostris. Ultio sanguinis servorum tuorum qui effusus est ;
Quare dicunt gentes ubi est Deus eorum nota fiat in gentibus ante oculos nostros ultio sanguinis servorum tuorum qui effusus est.
11 Introeat in conspectu tuo gemitus compeditorum ! Secundum magnitudinem brachii tui posside filios mortificatorum,
Ingrediatur coram te gemitus vinctorum in magnitudine brachii tui relinque filios interitus.
12 Et redde vicinis nostris septuplum in sinu eorum ! improperium ipsorum quod exprobraverunt tibi, Domine !
Et redde vicinis nostris septuplum in sinu eorum obprobrium suum quo exprobraverunt tibi Domine.
13 Nos autem populus tuus, et oves pascuæ tuæ, confitebimur tibi in seculum ; in generationem et generationem annuntiabimus laudem tuam.
Nos enim populus tuus et grex pascuae tuae confitebimur tibi in sempiternum in generatione et generatione narrabimus laudes tuas.
Hieronymus Vulgata - Vide psalmum 78. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 78. || Nova Vulgata Bibliorum Sacrorum Editio.