Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER II
 

(Versiculus)

71 (Psalmus David. Filiorum Jonadab, et priorum captivorum.) In te, Domine, speravi ; non confundar in æternum ;

In te Domine speravi ne confundar in aeternum.

2 In justitia tua libera me, et eripe me. Inclina ad me aurem tuam, et salva me.

Iustitia tua erue me et libera inclina ad me aurem tuam et salva me.

3 Esto mihi in Deum protectorem, et in locum munitum, ut salvum me facias, quoniam firmamentum meum et refugium meum es tu.

Esto mihi robustum habitaculum ut ingrediar iugiter praecepisti ut salvares me quia petra mea et fortitudo mea es tu.

4 Deus meus, eripe me de manu peccatoris, et de manu contra legem agentis, et iniqui,

Deus meus salva me de manu impii de manu iniqui et nocentis.

5 Quoniam tu es patientia mea, Domine ; Domine, spes mea a juventute mea.

Quia tu es expectatio mea Deus Domine fiducia mea ab adulescentia mea.

6 In te confirmatus sum ex utero ; de ventre matris meæ tu es protector meus. In te cantatio mea semper.

A te sustentatus sum ex utero de ventre matris meae tu es protector meus in te laus mea semper.

7 Tanquam prodigium factus sum multis ; et tu adjutor fortis.

Quasi portentum factus sum multis et tu spes mea fortissima.

8 Repleatur os meum laude, ut cantem gloriam tuam, tota die magnitudinem tuam.

Impleatur os meum laude tua tota die magnitudine tua.

9 Ne projicias me in tempore senectutis ; cum defecerit virtus mea, ne derelinquas me.

Ne proicias me in tempore senectutis cum defecerit fortitudo mea ne derelinquas me.

10 Quia dixerunt inimici mei mihi, et qui custodiebant animam meam consilium fecerunt in unum,

Quia dixerunt inimici mei mihi et qui observabant animam meam inierunt consilium pariter.

11 Dicentes : Deus dereliquit eum ; persequimini et comprehendite eum, quia non est qui eripiat.

Dicentes Deus dereliquit eum persequimini et conprehendite eum quia non est qui eruat.

12 Deus, ne elongeris a me ; Deus meus, in auxilium meum respice.

Deus ne elongeris a me Deus meus ad auxiliandum mihi festina.

13 Confundantur, et deficiant detrahentes animæ meæ ; operiantur confusione et pudore qui quærunt mala mihi.

Confundantur et consumantur adversarii animae meae operiantur obprobrio et confusione qui quaerunt malum mihi.

14 Ego autem semper sperabo, et adjiciam super omnem laudem tuam.

Ego autem iugiter expectabo et adiciam super omnes laudationes tuas.

15 Os meum annuntiabit justitiam tuam, tota die salutare tuum. Quoniam non cognovi litteraturam,

Os meum narrabit iustitiam tuam tota die salutare tuum quia non cognovi litteraturas.

16 Introibo in potentias Domini ; Domine, memorabor justitiæ tuæ solius.

Ingrediar in fortitudine Domini Dei recordabor iustitiae tuae solius.

17 Deus, docuisti me a juventute mea ; et usque nunc pronuntiabo mirabilia tua.

Deus docuisti me ab adulescentia mea et usque nunc adnuntiabo mirabilia tua.

18 Et usque in senectam et senium, Deus, ne derelinquas me. Donec annuntiem brachium tuum generationi omni quæ ventura est ; potentiam tuam,

Insuper et usque ad senectutem et canos Deus ne derelinquas me donec adnuntiem brachium tuum generationi cunctisque qui venturi sunt fortitudines tuas.

19 Et justitiam tuam, Deus, usque in altissima quæ fecisti magnalia. Deus, quis similis tibi ?

Et iustitiam tuam Deus usque in excelsum quanta fecisti magnalia Deus quis similis tibi.

20 Quantas ostendisti mihi tribulationes multas et malas ! et conversus vivificasti me, et de abyssis terræ iterum reduxisti me.

Qui ostendisti mihi tribulationes plurimas et adflictiones conversus vivificabis nos et de abyssis terrae rursum educes nos.

21 Multiplicasti magnificentiam tuam ; et conversus consolatus es me.

Multiplicabis magnitudinem meam et conversus consolaberis me.

22 Nam et ego confitebor tibi in vasis psalmi veritatem tuam ; Deus, psallam tibi in cithara, sanctus Israel !

Ego autem confitebor tibi in vasis psalterii veritatem tuam Deus meus cantabo tibi in cithara Sancte Israhel.

23 Exsultabunt labia mea cum cantavero tibi ; et anima mea quam redemisti.

Laudabunt labia mea cum cantavero tibi et anima mea quam redemisti.

24 Sed et lingua mea tota die meditabitur justitiam tuam, cum confusi et reveriti fuerint qui quærunt mala mihi.

Insuper et lingua mea tota die meditabitur iustitiam tuam quia confusi sunt et dehonestati quaerentes malum mihi.



Hieronymus Vulgata - Vide psalmum 70. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 70. || Nova Vulgata Bibliorum Sacrorum Editio.

spacer 


Aperit