49 (In finem, n filiis Core. Psalmus.) Audite hæc, omnes gentes ; auribus percipite, omnes qui habitatis orbem ;
Victori filiorum Core canticum. Audite hoc omnes populi auribus percipite universi habitatores occidentis.
2 Quique terrigenæ et filii hominum, simul in unum dives et pauper.
Tam filii Adam quam filii singulorum simul dives et pauper.
3 Os meum loquetur sapientiam, et meditatio cordis mei prudentiam.
Os meum loquitur sapientias et meditatio cordis mei prudentias.
4 Inclinabo in parabolam aurem meam ; aperiam in psalterio propositionem meam.
Inclino ad parabulam aurem meam aperiam in cithara enigma meum.
5 Cur timebo in die mala ? iniquitas calcanei mei circumdabit me.
Quare timebo in diebus mali iniquitas calcanei mei circumdabit me.
6 Qui confidunt in virtute sua, et in multitudine divitiarum suarum gloriantur.
Qui fiduciam habent in fortitudine sua et in multitudine divitiarum suarum superbiunt.
7 Frater non redimit, redimet homo : Non dabit Deo placationem suam.
Fratrem redimens non redimet vir nec dabit Deo propitiationem pro eo.
8 Et pretium redemptionis animæ suæ. Et laborabit in æternum.
Neque pretium redemptionis animae eorum sed quiescet in saeculo.
9 Et vivet adhuc in finem.
Et vivet ultra in sempiternum.
10 Non videbit interitum, cum viderit sapientes morientes. Simul insipiens et stultus peribunt ; et relinquent alienis divitias suas ;
Et non videbit interitum cum viderit sapientes morientes simul insipiens et indoctus peribunt et derelinquent alienis divitias suas.
11 Et sepulchra eorum domus illorum in æternum. Tabernacula eorum in progenie et progenie ; vocaverunt nomina sua in terris suis.
Interiora sua domus suas in saeculo tabernacula sua in generatione et generatione vocaverunt nominibus suis terras suas.
12 Et homo, cum in honore esset, non intellexit. Comparatus est jumentis insipientibus, et similis factus est illis.
Et homo in honore non commorabitur adsimilatus est iumentis et exaequatus est.
13 Hæc via illorum scandalum ipsis ; et postea in ore suo complacebunt.
Haec est via insipientiae eorum et post eos iuxta os eorum current semper.
14 Sicut oves in inferno positi sunt ; mors depascet eos. Et dominabuntur eorum justi in matutino ; et auxilium eorum veterascet in inferno a gloria eorum.
Quasi grex in inferno positi sunt mors pascet eos et subicient eos recti in matutino et figura eorum conteretur in inferno post habitaculum suum.
15 Verumtamen Deus redimet animam meam de manu inferi, cum acceperit me.
Verumtamen Deus redimet animam meam de manu inferi cum adsumpserit me semper.
16 Ne timueris cum dives factus fuerit homo, et cum multiplicata fuerit gloria domus ejus ;
Noli timere cum ditatus fuerit vir cum multiplicata fuerit gloria domus eius.
17 Quoniam, cum interierit, non sumet omnia, neque descendet cum eo gloria ejus.
Neque enim moriens tollet omnia nec descendet post eum gloria eius.
18 Quia anima ejus in vita ipsius benedicetur. Confitebitur tibi cum benefeceris ei.
Quia animae suae in vita sua benedicet laudabunt inquient te cum benefeceris tibi.
19 Introibit usque in progenies patrum suorum ; et usque in æternum non videbit lumen.
Intrabit usque ad generationes patrum suorum usque ad finem non videbunt lucem.
20 Homo, cum in honore esset, non intellexit. Comparatus est jumentis insipientibus, et similis factus est illis.
Homo cum in honore esset non intellexit conparavit se iumentis et silebitur.
Hieronymus Vulgata - Vide psalmum 48. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 48. || Nova Vulgata Bibliorum Sacrorum Editio.