46 (In finem. n Filiis Core pro arcanis. Psalmus.) Deus noster refugium et virtus ; adjutor in tribulationibus quæ invenerunt nos nimis.
Victori filiorum Core pro iuventutibus canticum. Deus nostra spes et fortitudo auxilium in tribulationibus inventus es validum.
2 Propterea non timebimus dum turbabitur terra, et transferentur montes in cor maris.
Ideo non timebimus cum fuerit translata terra et concussi montes in corde maris.
3 Sonuerunt, et turbatæ sunt aquæ eorum ; conturbati sunt montes in fortitudine ejus.
Sonantibus et intumescentibus gurgitibus eius et agitatis montibus in potentia eius semper.
4 Fluminis impetus lætificat civitatem Dei. Sanctificavit tabernaculum suum Altissimus.
Fluminis divisiones laetificant civitatem Dei sanctum tabernaculum Altissimi.
5 Deus in medio ejus ; non commovebitur ; adjuvabit eam Deus mane diluculo.
Dominus in medio eius non commovebitur auxiliabitur ei Deus in ipso ortu matutino.
6 Conturbatæ sunt gentes, et inclinata sunt regna. Dedit vocem suam, mota est terra.
Conturbatae sunt gentes concussa sunt regna dedit vocem suam prostrata est terra.
7 Dominus virtutum nobiscum ; susceptor noster Deus Jacob.
Dominus exercituum nobiscum protector noster Deus Iacob semper.
8 Venite, et videte opera Domini, quæ posuit prodigia super terram,
Venite et videte opera Domini quantas posuerit solitudines in terra.
9 Auferens bella usque ad finem terræ. Arcum conteret, et confringet arma ; et scuta comburet igni.
Conpescuit bella usque ad extremum terrae arcum confringet et concidet hastam plaustra conburet igni.
10 Vacate, et videte quoniam ego sum Deus. Exaltabor in gentibus, et exaltabor in terra.
Cessate et cognoscite quoniam ego sum Deus exaltabor in gentibus exaltabor in terra.
11 Dominus virtutum nobiscum ; susceptor noster Deus Jacob.
Dominus exercituum nobiscum fortitudo nostra Deus Iacob semper.
Hieronymus Vulgata - Vide psalmum 45. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 45. || Nova Vulgata Bibliorum Sacrorum Editio.