45 (In finem, n pro iis qui commutabuntur, filiis Core, ad intellectum, canticum pro dilecto.) Eructavit cor meum verbum bonum ; dico ego opera mea regi. Lingua mea calamus scribæ velociter scribentis.
Victori pro liliis filiorum Core eruditionis canticum amantissimi. Eructavit cor meum verbum bonum dico ego opera mea regi lingua mea stilus scribae velocis.
2 Speciosus forma præ filiis hominum, diffusa est gratia in labiis tuis ; propterea benedixit te Deus in æternum.
Decore pulchrior es filiis hominum effusa est gratia in labiis tuis propterea benedixit tibi Deus in aeternum.
3 Accingere gladio tuo super femur tuum, potentissime.
Accingere gladio tuo super femur fortissime.
4 Specie tua et pulchritudine tua intende, prospere procede, et regna, propter veritatem, et mansuetudinem, et justitiam ; et deducet te mirabiliter dextera tua.
Gloria tua et decore tuo decore tuo prospere ascende propter veritatem et mansuetudinem iustitiae et docebit te terribilia dextera tua.
5 Sagittæ tuæ acutæ, populi sub te cadent, in corda inimicorum regis.
Sagittae tuae acutae populi sub te cadent in corde inimicorum regis.
6 Sedes tua, Deus, in seculum seculi ; virga directionis virga regni tui.
Thronus tuus Deus in saeculum et in aeternum sceptrum aequitatis sceptrum regni tui.
7 Dilexisti justitiam, et odisti iniquitatem ; propterea unxit te Deus, Deus tuus, oleo lætitiæ, præ consortibus tuis.
Dilexisti iustitiam et odisti iniquitatem propterea unxit te Deus Deus tuus oleo exultationis prae participibus tuis.
8 Myrrha, et gutta, et casia a vestimentis tuis, a domibus eburneis ; ex quibus delectaverunt te
Zmyrna et stacte et cassia in cunctis vestimentis tuis de domibus eburneis quibus laetificaverunt te.
9 Filiæ regum in honore tuo. Astitit regina a dextris tuis in vestitu deaurato, circumdata varietate.
Filiae regum in honore tuo stetit coniux in dextera tua in diademate aureo.
10 Audi, filia, et vide, et inclina aurem tuam ; et obliviscere populum tuum, et domum patris tui.
Audi filia et vide et inclina aurem tuam et obliviscere populi tui et domus patris tui.
11 Et concupiscet rex decorem tuum, quoniam ipse est Dominus Deus tuus, et adorabunt eum.
Et concupiscet rex decorem tuum quia ipse est dominus tuus et adora eum.
12 Et filiæ Tyri in muneribus vultum tuum deprecabuntur ; omnes divites plebis.
Et o filia fortissimi in muneribus faciem tuam deprecabuntur divites populi.
13 Omnis gloria ejus filiæ regis ab intus, in fimbriis aureis
Omnis gloria filiae regis intrinsecus fasceis aureis vestita est.
14 Circumamicta varietatibus. Adducentur regi virgines post eam, proximæ ejus afferentur tibi.
In scutulatis ducetur ad regem virgines sequentur eam amicae eius ducentur illuc.
15 Afferentur in lætitia et exsultatione ; adducentur in templum regis.
Ducentur in laetitiis et exultatione ingredientur thalamum regis.
16 Pro patribus tuis nati sunt tibi filii ; constitues eos principes super omnem terram.
Pro patribus tuis erunt filii tibi pones eos principes in universa terra.
17 Memores erunt nominis tui in omni generatione et generationem. Propterea populi confitebuntur tibi in æternum, et in seculum seculi.
Recordabor nominis tui in omni generatione et generatione propterea populi confitebuntur tibi in saeculum et in aeternum.
Hieronymus Vulgata - Vide psalmum 44. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 44. || Nova Vulgata Bibliorum Sacrorum Editio.