Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER I
 

(Versiculus)

40 (In finem. Psalmus ipsi David.) Exspectans, exspectavi Dominum, et intendit mihi.

Pro victoria David canticum. Expectans expectavi Dominum et inclinatus est ad me.

2 Et exaudivit preces meas, et eduxit me de lacu miseriæ, et de luto fæcis. Et statuit super petram pedes meos, et direxit gressus meos.

Et audivit clamorem meum et eduxit me de lacu famoso de luto caeni et statuit super petram pedes meos stabilivit gressus meos.

3 Et immisit in os meum canticum novum, carmen Deo nostro. Videbunt multi, et timebunt ; et sperabunt in Domino.

Et dedit in ore meo canticum novum laudem Deo nostro videbunt multi et timebunt et sperabunt in Domino.

4 Beatus vir cujus est nomen Domini spes ejus, et non respexit in vanitates et insanias falsas.

Beatus vir qui posuit Dominum confidentiam suam et non est aversus ad superbias pompasque mendacii.

5 Multa fecisti tu, Domine Deus meus, mirabilia tua ; et cogitationibus tuis non est qui similis sit tibi. Annuntiavi et locutus sum, multiplicati sunt super numerum.

Multa fecisti tu Domine Deus meus mirabilia tua et cogitationes tuas pro nobis non invenio ordinem coram te si narrare voluero et numerare plura sunt quam ut narrari queant.

6 Sacrificium et oblationem noluisti ; aures autem perfecisti mihi. Holocaustum et pro peccato non postulasti ;

Victima et oblatione non indiges aures fodisti mihi holocaustum et pro peccato non petisti.

7 Tunc dixi : Ecce venio. In capite libri scriptum est de me,

Tunc dixi ecce venio in volumine libri scriptum est de me.

8 Ut facerem voluntatem tuam. Deus meus, volui, et legem tuam in medio cordis mei.

Ut facerem placitum tibi Deus meus volui et legem tuam in medio ventris mei.

9 Annuntiavi justitiam tuam in ecclesia magna, ecce labia mea non prohibebo ; Domine, tu scisti.

Adnuntiavi iustum in ecclesia multa ecce labia mea non prohibebo Domine tu nosti.

10 Justitiam tuam non abscondi in corde meo ; veritatem tuam et salutare tuum dixi. Non abscondi misericordiam tuam et veritatem tuam a concilio multo.

Iustitiam tuam non abscondi in medio cordis mei fidem tuam et salutare tuum dixi non abscondi misericordiam tuam et veritatem tuam in ecclesia multa.

11 Tu autem, Domine, ne longe facias miserationes tuas a me ; misericordia tua et veritas tua semper susceperunt me.

Tu Domine non prohibebis misericordias tuas a me misericordia tua et veritas iugiter servabunt me.

12 Quoniam circumdederunt me mala quorum non est numerus ; comprehenderunt me iniquitates meæ, et non potui ut viderem. Multiplicatæ sunt super capillos capitis mei, et cor meum dereliquit me.

Circumdederunt enim me mala quorum non est numerus conprehenderunt me iniquitates meae et non potui videre plures factae sunt quam capilli capitis mei et cor meum dereliquit me.

13 Complaceat tibi, Domine, ut eruas me ; Domine, ad adjuvandum me respice.

Placeat tibi Domine ut liberes me Domine ad adiuvandum me festina.

14 Confundantur et revereantur simul, qui quærunt animam meam, ut auferant eam. Convertantur retrorsum et revereantur, qui volunt mihi mala.

Confundantur et revereantur simul quaerentes animam meam ut auferant eam convertantur retrorsum et confundantur qui volunt mala mihi.

15 Ferant confestim confusionem suam, qui dicunt mihi : Euge, euge !

Pereant post confusionem suam qui dicunt mihi va va.

16 Exsultent et lætentur super te omnes quærentes te, et dicant semper : Magnificetur Dominus, qui diligunt salutare tuum.

Gaudeant et laetentur in te qui quaerunt te dicant iugiter magnificetur Dominus qui diligunt salutare tuum.

17 Ego autem mendicus sum et pauper ; Dominus sollicitus est mei. Adjutor meus et protector meus tu es, Deus meus, ne tardaveris.

Ego autem sum egens et pauper Dominus sollicitus erit pro me auxilium meum et salutare meum tu Deus meus ne moreris.



Hieronymus Vulgata - Vide psalmum 39. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 39. || Nova Vulgata Bibliorum Sacrorum Editio.

spacer 


Aperit