41 (In finem. n Psalmus ipsi David.) Beatus qui intelligit super egenum et pauperem ! in die mala liberabit eum Dominus.
Pro victoria canticum David. Beatus qui cogitat de paupere in die mala salvabit eum Dominus.
2 Dominus conservet eum, et vivificet eum, et beatum faciat eum in terra, et non tradat eum in animam inimicorum ejus.
Dominus custodiet eum et vivificabit eum et beatus erit in terra et non tradet eum animae inimicorum suorum.
3 Dominus opem ferat illi super lectum doloris ejus. Universum stratum ejus versasti in infirmitate ejus.
Dominus confortabit eum in lecto infirmitatis totum stratum eius vertisti in aegrotatione sua.
4 Ego dixi : Domine, miserere mei ; sana animam meam, quia peccavi tibi.
Ego dixi Domine miserere mei sana animam meam quoniam peccavi tibi.
5 Inimici mei dixerunt mala mihi : Quando morietur, et peribit nomen ejus ?
Inimici mei loquentur malum mihi quando morietur et periet nomen eius.
6 Et si ingrediebatur ut videret, vana loquebatur ; cor ejus congregavit iniquitatem sibi. Egrediebatur foras et loquebatur.
Et si venerit ut visitet vana loquetur cor eius congregabit iniquitatem sibi et egrediens foras detrahet.
7 In idipsum. Adversum me susurrabant omnes inimici mei ; adversum me cogitabant mala mihi.
Simul adversum me murmurabant omnes odientes me contra cogitabant malum mihi.
8 Verbum iniquum constituerunt adversum me. Numquid qui dormit non adjiciet ut resurgat ?
Verbum diabuli infundebant sibi qui dormivit non addet ut resurgat.
9 Etenim homo pacis meæ, in quo speravi, qui edebat panes meos, magnificavit super me supplantationem.
Sed et homo pacificus meus in quo habui fiduciam qui manducabat panem meum levavit contra me plantam.
10 Tu autem, Domine, miserere mei, et resuscita me, et retribuam eis.
Tu autem Domine miserere mei et leva me ut reddam eis.
11 In hoc cognovi quoniam voluisti me, quoniam non gaudebit inimicus meus super me.
In hoc cognovi quod velis me quia non insultavit inimicus meus mihi.
12 Me autem propter innocentiam suscepisti ; et confirmasti me in conspectu tuo in æternum.
Ego autem in simplicitate mea adiutus sum a te et statues me ante faciem tuam in perpetuum.
13 Benedictus Dominus, Deus Israel, a seculo, et usque in seculum ! Fiat, fiat.
Benedictus Dominus Deus Israhel a saeculo et usque in saeculum amen amen.
Hieronymus Vulgata - Vide psalmum 40. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 40. || Nova Vulgata Bibliorum Sacrorum Editio.