Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER I
 

(Versiculus)

37 (Psalmus ipsi David.) Noli æmulari in malignantibus, neque zelaveris facientes iniquitatem.

David aleph. Noli contendere cum malignis neque aemuleris facientes iniquitatem.

2 Quoniam tanquam fœnum velociter arescent, et quemadmodum olera herbarum cito decident.

Quoniam sicut herba velociter conterentur et sicut holus viride arescent.

3 Spera in Domino, et fac bonitatem ; et inhabita terram, et pasceris in divitiis ejus.

Beth spera in Domino et fac bonum peregrinare in terra et pascere fide.

4 Delectare in Domino, et dabit tibi petitiones cordis tui.

Et delectare in Domino et dabit tibi petitiones cordis tui.

5 Revela Domino viam tuam, et spera in eo ; et ipse faciet.

Gimel volve super Dominum viam tuam et confide in eo et ipse faciet.

6 Et educet quasi lumen justitiam tuam, et judicium tuum tanquam meridiem.

Et educet sicut lumen iustitiam tuam et iudicium tuum sicut meridiem.

7 Subditus esto Domino, et ora eum. Noli æmulari in eo qui prosperatur in via sua, in homine faciente injustitias.

Deleth tace Domino et expecta eum noli contendere adversum eum qui proficit in via sua adversum virum qui facit quae cogitat.

8 Desine ab ira, et derelinque furorem ; noli æmulari ut maligneris.

He dimitte iram et relinque furorem noli contendere ut malefacias.

9 Quoniam qui malignantur, exterminabuntur ; sustinentes autem Dominum, ipsi hæreditabunt terram.

Quoniam qui malefaciunt interibunt expectantes autem Dominum ipsi hereditabunt terram.

10 Et adhuc pusillum, et non erit peccator ; et quæres locum ejus, et non invenies.

Vav adhuc enim modicum et non erit impius et cogitabis de loco eius et non subsistet.

11 Mansueti autem hæreditabunt terram, et delectabuntur in multitudine pacis.

Mites autem hereditabunt terram et delectabuntur in multitudine pacis.

12 Observabit peccator justum, et stridebit super eum dentibus suis.

Zai cogitat impius de iusto et frendet adversum eum dentibus suis.

13 Dominus autem irridebit eum, quoniam prospicit quod veniet dies ejus.

Dominus deridebit eum videns quod venit dies eius.

14 Gladium evaginaverunt peccatores, intenderunt arcum suum, ut dejiciant pauperem et inopem, ut trucident rectos corde.

Heth gladium evaginaverunt impii tetenderunt arcum suum ut percutiant egenum et pauperem et interficiant rectos in via.

15 Gladius eorum intret in corda ipsorum, et arcus eorum confringatur.

Gladius eorum ingrediatur in cor eorum et arcus eorum confringantur.

16 Melius est modicum justo, super divitias peccatorum multas.

Teth melius est parum iusto quam divitiae impiorum multae.

17 Quoniam brachia peccatorum conterentur ; confirmat autem justos Dominus.

Quia brachia impiorum confringentur sublevat autem iustos Dominus.

18 Novit Dominus dies immaculatorum, et hæreditas eorum in æternum erit.

Ioth novit Dominus diem inmaculatorum et hereditas eorum aeterna erit.

19 Non confundentur in tempore malo, et in diebus famis saturabuntur,

Non confundentur in tempore malo et in diebus famis saturabuntur.

20 Quia peccatores peribunt. Inimici vero Domini mox ut honorificati fuerint et exaltati, deficientes quemadmodum fumus deficient.

Caph quia impii peribunt et inimici Domini gloriantes ut monocerotes consumentur sicut fumus consumitur.

21 Mutuabitur peccator, et non solvet ; justus autem miseretur et tribuet.

Lameth fenus accipit impius et non reddit iustus autem donat et tribuit.

22 Quia benedicentes ei hæreditabunt terram ; maledicentes autem ei disperibunt.

Quia qui benedicti fuerint ab eo hereditabunt terram et qui maledicti interibunt.

23 Apud Dominum gressus hominis dirigentur ; et viam ejus volet.

Mem a Domino gressus viri firmantur et viam eius volet.

24 Cum ceciderit, non collidetur, quia Dominus supponit manum suam.

Cum ceciderit non adlidetur quia Dominus sustentat manum eius.

25 Junior fui, etenim senui ; et non vidi justum derelictum, nec semen ejus quærens panem.

Nun puer fui siquidem senui et non vidi iustum derelictum neque semen eius quaerens panem.

26 Tota die miseretur et commodat ; et semen illius in benedictione erit.

Tota die donat et commodat et semen eius in benedictione.

27 Declina a malo, et fac bonum, et inhabita in seculum seculi.

Samech recede a malo et fac bonum et habita in sempiterno.

28 Quia Dominus amat judicium, et non derelinquet sanctos suos, in æternum conservabuntur. Injusti punientur et semen impiorum peribit.

Quia Dominus diligit iudicium et non derelinquet sanctos suos ain in aeternum custoditi sunt et semen impiorum periit.

29 Justi autem hæreditabunt terram, et inhabitabunt in seculum seculi super eam.

Iusti hereditabunt terram et habitabunt in saeculum super eam.

30 Os justi meditabitur sapientiam, et lingua ejus loquetur judicium.

Fe os iusti meditabitur sapientiam et lingua eius loquetur iudicium.

31 Lex Dei ejus in corde ipsius, et non supplantabuntur gressus ejus.

Lex Dei eius in corde eius non deficient gressus eius.

32 Considerat peccator justum, et quærit mortificare eum.

Sade considerat impius iustum et quaerit ut occidat eum.

33 Dominus autem non derelinquet eum in manibus ejus, nec damnabit eum cum judicabitur illi.

Dominus non derelinquet eum in manu eius et non condemnabit eum cum iudicatur.

34 Exspecta Dominum, et custodi viam ejus ; et exaltabit te ut hæreditate capias terram. Cum perierint peccatores, videbis.

Coph expecta Dominum et custodi viam eius et exaltabit te ut possideas terram cum interibunt impii videbis.

35 Vidi impium superexaltatum, et elevatum sicut cedros Libani.

Res vidi impium robustum et fortissimum sicut indigenam virentem.

36 Et transivi, et ecce non erat ; et quæsivi eum, et non est inventus locus ejus.

Et transivi et ecce non erat et quaesivi eum et non est inventus.

37 Custodi innocentiam, et vide æquitatem, quoniam sunt reliquiæ homini pacifico.

Sen custodi simplicitatem et vide rectum quia erit ad extremum viro pax.

38 Injusti autem disperibunt simul ; reliquiæ impiorum interibunt.

Iniqui autem delebuntur pariter et novissimum impiorum peribit.

39 Salus autem justorum a Domino ; et protector eorum in tempore tribulationis.

Thau salus iustorum a Domino fortitudo eorum in tempore tribulationis.

40 Et adjuvabit eos Dominus, et liberabit eos ; et eruet eos a peccatoribus, et salvabit eos, quia speraverunt in eo.

Et auxiliabitur eis Dominus et salvabit eos ab impiis quia speraverunt in eo.



Hieronymus Vulgata - Vide psalmum 36. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 36. || Nova Vulgata Bibliorum Sacrorum Editio.

spacer 


Aperit