35 (Ipsi David.) Judica, Domine, nocentes me ; expugna impugnantes me.
David. Iudica Domine adversarios meos pugna contra pugnantes me.
2 Apprehende arma et scutum, et exsurge in adjutorium mihi.
Adprehende scutum et hastam et consurge in auxilium meum.
3 Effunde frameam, et conclude adversus eos qui persequuntur me ; dic animæ meæ : Salus tua ego sum.
Evagina gladium et praeoccupa ex adverso persequentem me dic animae meae salus tua ego sum.
4 Confundantur et revereantur quærentes animam meam. Avertantur retrorsum et confundantur cogitantes mihi mala.
Confundantur et revereantur qui quaerunt animam meam convertantur retrorsum et confundantur qui cogitant malum mihi.
5 Fiant tanquam pulvis ante faciem venti, et angelus Domini coarctans eos.
Fiant sicut pulvis ante faciem venti et angelus Domini inpellat.
6 Fiat via illorum tenebræ, et lubricum ; et angelus Domini persequens eos.
Sit via eorum tenebrae et lubricum et angelus Domini persequatur eos.
7 Quoniam gratis absconderunt mihi interitum laquei sui, supervacue exprobraverunt animam meam.
Quia frustra absconderunt mihi insidias retis sui sine causa foderunt animae meae.
8 Veniat illi laqueus quem ignorat ; et captio quam abscondit apprehendat eum ; et in laqueum cadat in ipsum.
Veniat ei calamitas quam ignorat et rete suum quod abscondit conprehendat eum et cadat in laqueum.
9 Anima autem mea exsultabit in Domino, et delectabitur super salutari suo.
Anima autem mea exultabit in Domino et laetabitur in salute sua.
10 Omnia ossa mea dicent : Domine, quis similis tibi ? Eripiens inopem de manu fortiorum ejus ; egenum et pauperem a diripientibus eum.
Omnia ossa mea dicent Domine quis similis tui eruens inopem a validiore et pauperem et mendicum a violento.
11 Surgentes testes iniqui, quæ ignorabam interrogabant me.
Surgentes testes iniqui quae nesciebam interrogabant me.
12 Retribuebant mihi mala pro bonis, sterilitatem animæ meæ.
Reddebant mihi mala pro bono sterilitatem animae meae.
13 Ego autem, cum mihi molesti essent, induebar cilicio. Humiliabam in jejunio animam meam, et oratio mea in sinu meo convertetur.
Ego autem cum infirmarer ab eis induebar cilicio humiliabam in ieiunio animam meam et oratio mea ad sinum meum revertetur.
14 Quasi proximum et quasi fratrem nostrum sic complacebam ; quasi lugens et contristatus sic humiliabar.
Quasi ad amicum quasi ad fratrem meum sic ambulabam quasi lugens mater tristis incurvabar.
15 Et adversum me lætati sunt, et convenerunt ; congregata sunt super me flagella, et ignoravi.
Et in infirmitate mea laetabantur et congregabantur collecti sunt adversum me percutientes et nesciebam.
16 Dissipati sunt ; nec compuncti, tentaverunt me, subsannaverunt me subsannatione ; frenduerunt super me dentibus suis.
Scindentes et non tacentes in simulatione verborum fictorum frendebant contra me dentibus suis.
17 Domine, quando respicies ? Restitue animam meam a malignitate eorum, a leonibus unicam meam.
Domine quanta aspicies converte animam meam a calamitatibus suis a leonibus solitariam meam.
18 Confitebor tibi in ecclesia magna ; in populo gravi laudabo te.
Confitebor tibi in ecclesia grandi in populo forti laudabo te.
19 Non supergaudeant mihi qui adversantur mihi inique, qui oderunt me gratis, et annuunt oculis.
Non laetentur super me inimici mei mendaces odientes me frustra coniventes oculo.
20 Quoniam mihi quidem pacifice loquebantur ; et in iracundia terræ loquentes, dolos cogitabant.
Non enim pacem loquuntur sed in rapina terrae verba fraudulenta concinnant.
21 Et dilataverunt super me os suum ; dixerunt : Euge, euge ! viderunt oculi nostri.
Et dilataverunt super me os suum dixerunt va va vidit oculus noster.
22 Vidisti, Domine, ne sileas ; Domine, ne discedas a me.
Vidisti Domine ne taceas Domine ne elongeris a me.
23 Exsurge, et intende judicio meo, Deus meus, et Dominus meus, in causam meam.
Consurge et evigila in iudicium meum Deus meus et Domine in causam meam.
24 Judica me secundum justitiam tuam, Domine Deus meus, et non supergaudeant mihi.
Iudica me secundum iustitiam meam Domine Deus meus et ne insultent mihi.
25 Non dicant in cordibus suis : Euge, euge, animæ nostræ ! nec dicant : Devoravimus eum.
Ne dicant in corde suo va va va animae nostrae ne dicant absorbuimus eum.
26 Erubescant et revereantur simul qui gratulantur malis meis ! Induantur confusione et reverentia qui magna loquuntur super me.
Confundantur et revereantur pariter qui laetantur in adflictione mea induantur confusione et verecundia qui magnificantur super me.
27 Exsultent et lætentur qui volunt justitiam meam ; et dicant semper : Magnificetur Dominus, qui volunt pacem servi ejus !
Laudent et laetentur qui volunt iustitiam meam et dicant semper magnificetur Dominus qui vult pacem servi sui.
28 Et lingua mea meditabitur justitiam tuam, tota die laudem tuam.
Et lingua mea meditabitur iustitiam tuam tota die laudem tuam.
Hieronymus Vulgata - Vide psalmum 34. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 34. || Nova Vulgata Bibliorum Sacrorum Editio.