34 (Davidi, n cum immutavit vultum suum coram Achimelech, et dimisit eum, et abiit.) Benedicam Dominum in omni tempore ; semper laus ejus in ore meo.
David quando commutavit os suum coram Abimelech et eiecit eum et abiit. Benedicam Domino in omni tempore semper laus eius in ore meo.
2 In Domino laudabitur anima mea. Audiant mansueti, et lætentur.
In Domino laetabitur anima mea audiant mites et laetentur.
3 Magnificate Dominum mecum ; et exaltemus nomen ejus in idipsum.
Magnificate Dominum mecum et exaltemus nomen eius pariter.
4 Exquisivi Dominum, et exaudivit me ; et ex omnibus tribulationibus meis eripuit me.
Quaesivi Dominum et exaudivit me et de omnibus angustiis meis liberavit me.
5 Accedite ad eum, et illuminamini ; et facies vestræ non confundentur.
Respicite ad eum et confluite et vultus vestri non confundentur.
6 Iste pauper clamavit, et Dominus exaudivit eum ; et de omnibus tribulationibus ejus salvavit eum.
Hic pauper clamavit et Dominus exaudivit de omnibus tribulationibus salvabit eum.
7 Immittet angelus Domini in circuitu timentium eum, et eripiet eos.
Circumdat angelus Domini in gyro timentes eum et eruet eos.
8 Gustate, et videte quoniam suavis est Dominus ; beatus vir qui sperat in eo !
Gustate et videte quoniam bonus Dominus beatus vir qui sperat in eo.
9 Timete Dominum, omnes sancti ejus, quoniam non est inopia timentibus eum.
Timete Dominum sancti eius quoniam non est inopia timentibus eum.
10 Divites eguerunt, et esurierunt ; inquirentes autem Dominum non minuentur omni bono.
Leones indiguerunt et esurierunt quaerentibus autem Dominum non deerit omne bonum.
11 Venite, filii, audite me ; timorem Domini docebo vos.
Venite filii audite me timorem Domini docebo vos.
12 Quis est homo qui vult vitam, diligit dies videre bonos ?
Quis est vir qui velit vitam diligens dies videre bonos.
13 Prohibe linguam tuam a malo, et labia tua ne loquantur dolum.
Custodi linguam tuam a malo et labia tua ne loquantur dolum.
14 Diverte a malo, et fac bonum ; inquire pacem, et persequere eam.
Recede a malo et fac bonum quaere pacem et persequere eam.
15 Oculi Domini super justos, et aures ejus in preces eorum.
Oculi Domini ad iustos et aures eius ad clamorem eorum.
16 Vultus autem Domini super facientes mala, ut perdat de terra memoriam eorum.
Vultus Domini super facientes malum ut perdat de terra memoriam eorum.
17 Clamaverunt justi, et Dominus exaudivit eos ; et ex omnibus tribulationibus eorum liberavit eos.
Clamaverunt et Dominus exaudivit et ex omnibus tribulationibus eorum liberavit eos.
18 Juxta est Dominus iis qui tribulato sunt corde, et humiles spiritu salvabit.
Iuxta est Dominus contritis corde et confractos spiritu salvabit.
19 Multæ tribulationes justorum ; et de omnibus his liberabit eos Dominus.
Multae tribulationes iusti et ex omnibus illis liberabit eum Dominus.
20 Custodit Dominus omnia ossa eorum ; unum ex his non conteretur.
Custodit omnia ossa eius unum ex eis non confringetur.
21 Mors peccatorum pessima ; et qui oderunt justum delinquent.
Interficiet impium malitia et odientes iustum superabuntur.
22 Redimet Dominus animas servorum suorum ; et non delinquent omnes qui sperant in eo.
Redimet Dominus animam servorum suorum et non peccabunt omnes sperantes in eo.
Hieronymus Vulgata - Vide psalmum 33. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 33. || Nova Vulgata Bibliorum Sacrorum Editio.