Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER I
 

(Versiculus)

31 (In finem. n Psalmus David, pro extasi.) In te, Domine, speravi ; non confundar in æternum ; in justitia tua libera me.

Victori canticum David. In te Domine speravi non confundar in aeternum in iustitia tua salva me.

2 Inclina ad me aurem tuam ; accelera ut eruas me. Esto mihi in Deum protectorem, et in domum refugii, ut salvum me facias.

Inclina ad me aurem tuam velociter libera me esto mihi in lapidem fortissimum et in domum munitam ut salves me.

3 Quoniam fortitudo mea et refugium meum es tu ; et propter nomen tuum deduces me et enutries me.

Quia petra mea et munitio mea tu es et propter nomen tuum dux meus eris et enutries me.

4 Educes me de laqueo hoc quem absconderunt mihi, quoniam tu es protector meus.

Educes me de rete quod absconderunt mihi quia tu fortitudo mea es.

5 In manus tuas commendo spiritum meum ; redemisti me, Domine, Deus veritatis.

In manu tua commendabo spiritum meum redemisti me Domine Deus veritatis.

6 Odisti observantes vanitates supervacue. Ego autem in Domino speravi.

Odisti custodientes vanitates frustra ego autem in Domino confisus sum.

7 Exsultabo, et lætabor in misericordia tua. Quoniam respexisti humilitatem meam, salvasti de necessitatibus animam meam.

Exultabo et laetabor in misericordia tua quia vidisti adflictionem meam cognovisti tribulationes animae meae.

8 Nec conclusisti me in manibus inimici ; statuisti in loco spatioso pedes meos.

Et non conclusisti me in manibus inimici posuisti in latitudine pedes meos.

9 Miserere mei, Domine, quoniam tribulor ; conturbatus est in ira oculus meus, anima mea, et venter meus.

Miserere mei Domine quoniam tribulor caligavit in furore oculus meus anima mea et venter meus.

10 Quoniam defecit in dolore, vita mea, et anni mei in gemitibus. Infirmata est in paupertate virtus mea ; et ossa mea conturbata sunt.

Quia consumptae sunt in maerore vitae meae et anni mei in gemitu infirmata est in iniquitate fortitudo mea et ossa mea contabuerunt.

11 Super omnes inimicos meos factus sum opprobrium, et vicinis meis valde, et timor notis meis. Qui videbant me, foras fugerunt a me.

Apud omnes hostes meos factus sum obprobrium et vicinis meis nimis et timor notis meis qui videbant me in plateis fugiebant me.

12 Oblivioni datus sum, tanquam mortuus a corde. Factus sum tanquam vas perditum ;

Oblivioni traditus sum quasi mortuus a corde factus sum quasi vas perditum.

13 Quoniam audivi vituperationem multorum commorantium in circuitu ; in eo dum convenirent simul adversum me, accipere animam meam consiliati sunt.

Audivi enim obprobrium multorum congregationem in circuitu cum inirent consilium adversum me et ut auferrent animam meam cogitarent.

14 Ego autem in te speravi, Domine. Dixi : Deus meus es tu ;

Ego autem in te speravi Domine dixi Deus meus es tu.

15 In manibus tuis sortes meæ. Eripe me de manu inimicorum meorum, et a persequentibus me.

In manu tua tempora mea libera me de manu inimicorum meorum et persequentium me.

16 Illustra faciem tuam super servum tuum ; salvum me fac in misericordia tua.

Ostende faciem tuam super servum tuum salva me in misericordia tua.

17 Domine, non confundar, quoniam invocavi te. Erubescant impii, et deducantur in infernum ;

Domine ne confundar quia invocavi te confundantur impii taceant in inferno.

18 Muta fiant labia dolosa. Quæ loquuntur adversus justum iniquitatem, in superbia, et in abusione.

Muta fiant labia mendacii quae loquuntur contra iustum vetera in superbia et despectione.

19 Quam magna multitudo dulcedinis tuæ, Domine, quam abscondisti timentibus te ! Perfecisti eis qui sperant in te, in conspectu filiorum hominum.

Quam multa est bonitas tua quam abscondisti timentibus te operatus es sperantibus in te in conspectu filiorum hominum.

20 Abscondes eos in abscondito faciei tuæ, a conturbatione hominum. Proteges eos in tabernaculo tuo a contradictione linguarum.

Abscondes eos in protectione vultus tui a duritia viri abscondes eos in umbra a contradictione linguarum.

21 Benedictus Dominus, quoniam mirificavit misericordiam suam mihi in civitate munita.

Benedictus Dominus qui mirabilem fecit misericordiam suam mihi in civitate munita.

22 Ego autem dixi in excessu mentis meæ : Projectus sum a facie oculorum tuorum. Ideo exaudisti vocem orationis meæ, dum clamarem ad te.

Ego autem dixi in stupore meo proiectus sum de conspectu oculorum eius ergone audisti vocem deprecationis meae cum clamarem ad te.

23 Diligite Dominum, omnes sancti ejus, quoniam veritatem requiret Dominus, et retribuet abundanter facientibus superbiam.

Diligite Dominum omnes sancti eius fideles servat Dominus et retribuet his qui satis operantur superbiam.

24 Viriliter agite, et confortetur cor vestrum, omnes qui speratis in Domino.

Confortamini et roboretur cor vestrum omnes qui expectatis Dominum.



Hieronymus Vulgata - Vide psalmum 30. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 30. || Nova Vulgata Bibliorum Sacrorum Editio.

spacer 


Aperit