Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER I
 

(Versiculus)

18 (In finem puero Domini David, qui locutus est Domino verba cantici hujus, in die qua eripuit eum Dominus de manu omnium inimicorum ejus, et de manu Saul, et dixit :) Diligam te, Domine, fortitudo mea.

Victori servo Domini David quae locutus est Domino verba cantici huius in die qua liberavit eum Dominus de manu omnium inimicorum suorum et de manu Saul et ait diligam te Domine fortitudo mea.

2 Dominus firmamentum meum, et refugium meum, et liberator meus. Deus meus adjutor meus, et sperabo in eum, protector meus, et cornu salutis meæ, et susceptor meus.

Domine petra mea et robur meum et salvator meus Deus meus fortis meus sperabo in eo scutum meum et cornu salutis meae susceptor meus.

3 Laudans invocabo Dominum, et ab inimicis meis salvus ero.

Laudatum invocabo Dominum et ab inimicis meis salvus ero.

4 Circumdederunt me dolores mortis, et torrentes iniquitatis conturbaverunt me.

Circumdederunt me funes mortis et torrentes diabuli terruerunt me.

5 Dolores inferni circumdederunt me, præoccupaverunt me laquei mortis.

Funes inferi circumdederunt me praevenerunt me laquei mortis.

6 In tribulatione mea invocavi Dominum, et ad Deum meum clamavi ; et exaudivit de templo sancto suo vocem meam ; et clamor meus in conspectu ejus introivit in aures ejus.

In tribulatione mea invocabo Dominum et ad Deum meum clamabo exaudiet de templo suo vocem meam et clamor meus ante faciem eius veniet in aures eius.

7 Commota est, et contremuit terra ; fundamenta montium conturbata sunt, et commota sunt, quoniam iratus est eis.

Commota est et contremuit terra et fundamenta montium concussa sunt et conquassata quoniam iratus est.

8 Ascendit fumus in ira ejus, et ignis a facie ejus exarsit ; carbones succensi sunt ab eo.

Ascendit fumus de furore eius et ignis ex ore eius devorans carbones incensi sunt ab eo.

9 Inclinavit cælos, et descendit ; et caligo sub pedibus ejus.

Inclinavit caelos et descendit et caligo sub pedibus eius.

10 Et ascendit super cherubim, et volavit ; volavit super pennas ventorum.

Et ascendit super cherub et volavit super pinnas venti.

11 Et posuit tenebras latibulum suum ; in circuitu ejus tabernaculum ejus, tenebrosa aqua in nubibus aëris.

Posuit tenebras latibulum suum in circuitu eius tabernaculum eius tenebrosas aquas in nubibus aetheris.

12 Præ fulgore in conspectu ejus nubes transierunt, grando et carbones ignis.

Prae fulgore in conspectu eius nubes transierunt grando et carbones ignis.

13 Et intonuit de cælo Dominus, et Altissimus dedit vocem suam, grando et carbones ignis.

Et intonuit de caelo Dominus et Altissimus dedit vocem suam grandinem et carbones ignis.

14 Et misit sagittas suas, et dissipavit eos ; fulgura multiplicavit, et conturbavit eos.

Et emisit sagittas suas et dissipavit eos fulgora multiplicavit et conturbavit illos.

15 Et apparuerunt fontes aquarum, et revelata sunt fundamenta orbis terrarum, ab increpatione tua, Domine, ab inspiratione spiritus iræ tuæ.

Et apparuerunt effusiones aquarum et revelata sunt fundamenta orbis ab increpatione tua Domine ab inspiratione spiritus furoris tui.

16 Misit de summo, et accepit me ; et assumpsit me de aquis multis.

Misit de alto et accepit me extraxit me de aquis multis.

17 Eripuit me de inimicis meis fortissimis, et ab his qui oderunt me, quoniam confortati sunt super me.

Liberavit me de inimicis meis potentissimis et de his qui oderant me quoniam robustiores me erant.

18 Prævenerunt me in die afflictionis meæ ; et factus est Dominus protector meus.

Praevenerunt me in die adflictionis meae et factus est Dominus firmamentum meum.

19 Et eduxit me in latitudinem ; salvum me fecit, quoniam voluit me.

Et eduxit me in latitudinem liberavit me quia placuit ei.

20 Et retribuet mihi Dominus secundum justitiam meam, et secundum puritatem manuum mearum retribuet mihi ;

Retribuit mihi Dominus secundum iustitiam meam et secundum munditiam manuum mearum reddidit mihi.

21 Quia custodivi vias Domini, nec impie gessi a Deo meo ;

Quia custodivi vias Domini et non egi impie a Deo meo.

22 Quoniam omnia judicia ejus in conspectu meo, et justitias ejus non repuli a me.

Omnia enim iudicia eius in conspectu meo et praecepta eius non amovi a me.

23 Et ero immaculatus cum eo ; et observabo me ab iniquitate mea.

Et fui inmaculatus cum eo et custodivi me ab iniquitate mea.

24 Et retribuet mihi Dominus secundum justitiam meam, et secundum puritatem manuum mearum in conspectu oculorum ejus.

Et restituit Dominus mihi secundum iustitiam meam et secundum munditiam manuum mearum in conspectu oculorum eius.

25 Cum sancto sanctus eris, et cum viro innocente innocens eris ;

Cum sancto sanctus eris cum viro innocente innocenter ages.

26 Et cum electo electus eris ; et cum perverso perverteris.

Cum electo electus eris et cum perverso pervertes.

27 Quoniam tu populum humilem salvum facies, et oculos superborum humiliabis.

Quia tu populum pauperem salvabis et oculos excelsos humiliabis.

28 Quoniam tu illuminas lucernam meam, Domine ; Deus meus, illumina tenebras meas.

Quia tu inluminabis lucernam meam Domine Deus meus inlustrabis tenebras meas.

29 Quoniam in te eripiar a tentatione ; et in Deo meo transgrediar murum.

In te enim curram accinctus et in Deo meo transiliam murum.

30 Deus meus, impolluta via ejus ; eloquia Domini igne examinata ; protector est omnium sperantium in se.

Deus inmaculata via eius eloquium Domini igne examinatum scutum est omnium sperantium in se.

31 Quoniam quis deus præter Dominum ? aut quis deus præter Deum nostrum ?

Quis est deus praeter Dominum et quis fortis praeter Deum nostrum.

32 Deus qui præcinxit me virtute, et posuit immaculatam viam meam ;

Deus qui accingit me fortitudine et posuit inmaculatam viam meam.

33 Qui perfecit pedes meos tanquam cervorum, et super excelsa statuens me ;

Coaequans pedes meos cervis et super excelsa statuens me.

34 Qui docet manus meas ad prælium ; et posuisti, ut arcum æreum, brachia mea ;

Docens manus meas ad proelium et conponens quasi arcum aereum brachia mea.

35 Et dedisti mihi protectionem salutis tuæ, et dextera tua suscepit me ; et disciplina tua correxit me in finem, et disciplina tua ipsa me docebit.

Dedisti mihi clipeum salutis tuae et dextera tua confortavit me et mansuetudo tua multiplicavit me.

36 Dilatasti gressus meos subtus me ; et non sunt infirmata vestigia mea.

Dilatabis gressus meos subtus me et non deficient tali mei.

37 Persequar inimicos meos, et comprehendam illos ; et non convertar donec deficiant.

Persequar inimicos meos et adprehendam et non revertar donec consumam eos.

38 Confringam illos, nec poterunt stare ; cadent subtus pedes meos.

Caedam eos et non poterunt surgere cadent sub pedibus meis.

39 Et præcinxisti me virtute ad bellum, et supplantasti insurgentes in me subtus me.

Accinxisti me fortitudine ad proelium incurvabis resistentes mihi sub me.

40 Et inimicos meos dedisti mihi dorsum, et odientes me disperdidisti.

Inimicorum meorum dedisti mihi dorsum et odientes me disperdidisti.

41 Clamaverunt, nec erat qui salvos faceret ; ad Dominum, nec exaudivit eos.

Clamabunt et non erit qui salvet ad Dominum et non exaudiet eos.

42 Et comminuam eos ut pulverem ante faciem venti ; ut lutum platearum delebo eos.

Delebo eos ut pulverem ante faciem venti ut lutum platearum proiciam eos.

43 Eripies me de contradictionibus populi ; constitues me in caput gentium.

Salvabis me a contradictionibus populi pones me in caput gentium.

44 Populus, quem non cognovi, servivit mihi ; in auditu auris obedivit mihi.

Populus quem ignoravi serviet mihi auditione auris oboediet mihi.

45 Filii alieni mentiti sunt mihi, filii alieni inveterati sunt, et claudicaverunt a semitis suis.

Filii alieni mentientur mihi filii alieni defluent et contrahentur in angustiis suis.

46 Vivit Dominus ! et benedictus Deus meus ! et exaltetur Deus salutis meæ !

Vivit Dominus et benedictus Deus meus et exaltabitur Deus salutis meae.

47 Deus qui das vindictas mihi, et subdis populos sub me ; liberator meus de inimicis meis iracundis.

Deus qui das vindictas mihi et congregas populos sub me qui servas me ab inimicis meis.

48 Et ab insurgentibus in me exaltabis me ; a viro iniquo eripies me.

Et a resistentibus mihi elevas me a viro iniquo libera me.

49 Propterea confitebor tibi in nationibus, Domine, et nomini tuo psalmum dicam ;

Propterea confitebor tibi in gentibus Domine et nomini tuo cantabo.

50 Magnificans salutes regis ejus, et faciens misericordiam christo suo David, et semini ejus usque in seculum.

Magnificanti salutes regis sui et facienti misericordiam christo suo David et semini eius usque in aeternum.



Hieronymus Vulgata - Vide psalmum 17. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 17. || Nova Vulgata Bibliorum Sacrorum Editio.

spacer 


Aperit