17 (Oratio David.) Exaudi, Domine, justitiam meam ; intende deprecationem meam. Auribus percipe orationem meam, non in labiis dolosis.
Oratio David. Audi Deus iustum intende deprecationem meam auribus percipe orationem meam absque labiis mendacii.
2 De vultu tuo judicium meum prodeat ; oculi tui videant æquitates.
De vultu tuo iudicium meum prodeat oculi tui videant aequitates.
3 Probasti cor meum, et visitasti nocte ; igne me examinasti, et non est inventa in me iniquitas.
Probasti cor meum visitasti nocte conflasti me et non invenisti.
4 Ut non loquatur os meum opera hominum, propter verba labiorum tuorum ego custodivi vias duras.
Cogitationes meas transire os meum in opere hominum propter verbum labiorum tuorum ego observavi vias latronis.
5 Perfice gressus meos in semitis tuis, ut non moveantur vestigia mea.
Sustenta gressus meos in callibus tuis et non labentur vestigia mea.
6 Ego clamavi, quoniam exaudisti me, Deus ; inclina aurem tuam mihi, et exaudi verba mea.
Ego invocavi te quia exaudies me Deus inclina aurem tuam mihi audi eloquium meum.
7 Mirifica misericordias tuas, qui salvos facis sperantes in te.
Mirabilem fac misericordiam tuam salvator sperantium.
8 A resistentibus dexteræ tuæ custodi me, ut pupillam oculi. Sub umbra alarum tuarum protege me,
A resistentibus dexterae tuae custodi me quasi pupillam intus in oculo in umbra alarum tuarum protege me.
9 A facie impiorum qui me afflixerunt. Inimici mei animam meam circumdederunt ;
A facie impiorum vastantium me inimici mei animam meam circumdederunt.
10 Adipem suum concluserunt ; os eorum locutum est superbiam.
Adipe suo concluserunt et ore locuti sunt superbe.
11 Projicientes me nunc circumdederunt me ; oculos suos statuerunt declinare in terram.
Incedentes adversum me nunc circumdederunt me oculos suos posuerunt declinare in terram.
12 Susceperunt me sicut leo paratus ad prædam, et sicut catulus leonis habitans in abditis.
Similitudo eius quasi leonis desiderantis praedam et quasi catuli leonis sedentis in absconditis.
13 Exsurge, Domine ; præveni eum, et supplanta eum ; eripe animam meam ab impio, frameam tuam
Surge Domine praeveni faciem eius incurva eum salva animam meam ab impio qui est gladius tuus.
14 Ab inimicis manus tuæ. Domine, a paucis de terra divide eos in vita eorum ; de absconditis tuis adimpletus est venter eorum. Saturati sunt filiis, et dimiserunt reliquias suas parvulis suis.
A viris manus tuae Domine qui mortui sunt in profundo quorum pars in vita et quorum de absconditis tuis replesti ventrem qui satiabuntur filiis et dimittent reliquias suas parvulis eorum.
15 Ego autem in justitia apparebo conspectui tuo ; satiabor cum apparuerit gloria tua.
Ego in iustitia videbo faciem tuam implebor cum evigilavero similitudine tua.
Hieronymus Vulgata - Vide psalmum 16. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 16. || Nova Vulgata Bibliorum Sacrorum Editio.