16 (Tituli inscriptio ipsi David.) Conserva me, Domine, quoniam speravi in te.
Humilis et simplicis David. Custodi me Deus quoniam speravi in te.
2 Dixi Domino : Deus meus es tu, quoniam bonorum meorum non eges.
Dicens Deo Dominus meus es tu bene mihi non est sine te.
3 Sanctis qui sunt in terra ejus, mirificavit omnes voluntates meas in eis.
Sanctis qui in terra sunt et magnificis omnis voluntas mea in eis.
4 Multiplicatæ sunt infirmitates eorum ; postea acceleraverunt. Non congregabo conventicula eorum de sanguinibus ; nec memor ero nominum eorum per labia mea.
Multiplicabuntur idola eorum post tergum sequentium non litabo libamina eorum de sanguine neque adsumam nomina eorum in labiis meis.
5 Dominus pars hæreditatis meæ, et calicis mei. Tu es qui restitues hæreditatem meam mihi.
Dominus pars hereditatis meae et calicis mei tu possessor sortis meae.
6 Funes ceciderunt mihi in præclaris ; etenim hæreditas mea præclara est mihi.
Lineae ceciderunt mihi in pulcherrimis et hereditas speciosissima mea est.
7 Benedicam Dominum qui tribuit mihi intellectum ; insuper et usque ad noctem increpuerunt me renes mei.
Benedicam Domino qui dedit consilium mihi insuper et noctibus erudierunt me renes mei.
8 Providebam Dominum in conspectu meo semper, quoniam a dextris est mihi, ne commovear.
Proponebam in conspectu meo semper quia a dextris meis est ne commovear.
9 Propter hoc lætatum est cor meum, et exsultavit lingua mea ; insuper et caro mea requiescet in spe.
Propterea laetatum est cor meum et exultavit gloria mea et caro mea habitavit confidenter.
10 Quoniam non derelinques animam meam in inferno, nec dabis sanctum tuum videre corruptionem.
Non enim derelinques animam meam in inferno nec dabis sanctum tuum videre corruptionem.
11 Notas mihi fecisti vias vitæ ; adimplebis me lætitia cum vultu tuo : delectationes in dextera tua usque in finem.
Ostendes mihi semitam vitae plenitudinem laetitiarum ante vultum tuum decores in dextera tua aeternos.
Hieronymus Vulgata - Vide psalmum 15. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 15. || Nova Vulgata Bibliorum Sacrorum Editio.