147 (Alleluja.) Laudate Dominum, quoniam bonus est psalmus ; Deo nostro sit jucunda, decoraque laudatio !
Alleluia. Laudate Dominum quoniam bonum est canticum Dei nostri quoniam decorum est pulchra laudatio.
2 Ædificans Jerusalem Dominus, dispersiones Israelis congregabit ;
Aedificabit Hierusalem Dominus eiectos Israhel congregabit.
3 Qui sanat contritos corde, et alligat contritiones eorum ;
Qui sanat contritos corde et alligat plagas eorum.
4 Qui numerat multitudinem stellarum, et omnibus eis nomina vocat.
Qui numerat multitudinem stellarum et omnes nomine suo vocat.
5 Magnus Dominus noster ; et magna virtus ejus ; et sapientiæ ejus non est numerus.
Magnus Dominus noster et multus fortitudine prudentiae eius non est numerus.
6 Suscipiens mansuetos Dominus ; humilians autem peccatores usque ad terram.
Suscipiens mansuetos Dominus humilians impios usque ad terram.
7 Præcinite Domino in confessione, psallite Deo nostro in cithara.
Canite Domino in confessione canite Deo nostro in cithara.
8 Qui operit cælum nubibus, et parat terræ pluviam ; qui producit in montibus fœnum, et herbam servituti hominum ;
Qui operit caelos nubibus et praebet terrae pluviam et oriri facit in montibus germen.
9 Qui dat jumentis escam ipsorum, et pullis corvorum invocantibus eum.
Qui dat iumentis panem suum filiis corvi clamantibus.
10 Non in fortitudine equi voluntatem habebit, nec in tibiis viri beneplacitum erit ei.
Non est in fortitudine equi voluntas eius neque in tibiis viri placetur ei.
11 Beneplacitum est Domino super timentes eum, et in eis qui sperant super misericordia ejus.
Placetur Domino in his qui timent eum et expectant misericordiam eius.
12 (Alleluja.) Lauda, Jerusalem, Dominum ; lauda Deum tuum, Sion.
Lauda Hierusalem Dominum cane Deum tuum Sion.
13 Quoniam confortavit seras portarum tuarum, benedixit filiis tuis in te.
Quia confortavit vectes portarum tuarum benedixit filiis tuis in medio tui.
14 Qui posuit fines tuos pacem, et adipe frumenti satiat te.
Qui posuit terminum tuum pacem adipe frumenti saturavit te.
15 Qui emittit eloquium suum terræ, velociter currit sermo ejus.
Qui emittit eloquium suum terrae velociter curret verbum eius.
16 Qui dat nivem sicut lanam, nebulam sicut cinerem spargit.
Qui dat nivem quasi lanam pruinas quasi cinerem spargit.
17 Mittit crystallum suam sicut buccellas. Ante faciem frigoris ejus quis sustinebit ?
Proicit glaciem suam quasi buccellas ante faciem frigoris eius quis stabit.
18 Emittet verbum suum, et liquefaciet ea. Flabit spiritus ejus ; et fluent aquæ.
Mittet verbum suum et solvet illa spirabit spiritu suo et fluent aquae.
19 Qui annuntiat verbum suum Jacob, justitias et judicia sua Israel.
Qui adnuntiat verbum suum Iacob praecepta sua et iudicia sua Israhel.
20 Non fecit taliter omni nationi, et judicia sua non manifestavit eis. Alleluja.
Non fecit similiter omni genti et iudicia eius non cognoscent alleluia.
Hieronymus Vulgata - Vide psalmum 146. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 146, 147. || Nova Vulgata Bibliorum Sacrorum Editio.