140 (In finem. n Psalmus David.) Eripe me, Domine, ab homine malo ; a viro iniquo eripe me.
Pro victoria canticum David. Erue me Domine ab homine malo a viris iniquis serva me.
2 Qui cogitaverunt iniquitates in corde, tota die constituebant prælia.
Qui cogitaverunt malitias in corde tota die versati sunt in proeliis.
3 Acuerunt linguas suas sicut serpentis ; venenum aspidum sub labiis eorum.
Exacuerunt linguam suam quasi serpens venenum aspidis sub labiis eorum semper.
4 Custodi me, Domine, de manu peccatoris, et ab hominibus iniquis eripe me. Qui cogitaverunt supplantare gressus meos.
Custodi me Domine de manu impii a viro iniquitatum serva me qui cogitaverunt subplantare gressus meos.
5 Absconderunt superbi laqueum mihi ; et funes extenderunt in laqueum ; juxta iter scandalum posuerunt mihi.
Absconderunt superbi laqueum mihi et funibus extenderunt rete iuxta semitam offendiculum posuerunt mihi semper.
6 Dixi Domino : Deus meus es tu ; exaudi, Domine, vocem deprecationis meæ.
Dixi Domino Deus meus tu audi Domine vocem deprecationis meae.
7 Domine, Domine, virtus salutis meæ, obumbrasti super caput meum in die belli.
Domine Deus fortitudo salutis meae protexisti caput meum in die belli.
8 Ne tradas me, Domine, a desiderio meo peccatori ; cogitaverunt contra me ; ne derelinquas me, ne forte exaltentur.
Ne des Domine desideria impii scelera eius ne effundantur et eleventur semper.
9 Caput circuitus eorum, labor labiorum ipsorum operiet eos.
Amaritudo convivarum meorum labor labiorum eorum operiat eos.
10 Cadent super eos carbones ; in ignem dejicies eos ; in miseriis non subsistent.
Cadent super eos carbones ignis deicies eos in foveas ut non consurgant.
11 Vir linguosus non dirigetur in terra ; virum injustum mala capient in interitu.
Vir linguosus non dirigetur in terra virum iniquum mala capient in interitu.
12 Cognovi quia faciet Dominus judicium inopis, et vindictam pauperum.
Scio quod faciet Dominus causam inopis iudicia pauperum.
13 Verumtamen justi confitebuntur nomini tuo ; et habitabunt recti cum vultu tuo.
Attamen iusti confitebuntur nomini tuo habitabunt recti cum vultu tuo.
Hieronymus Vulgata - Vide psalmum 139. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 139. || Nova Vulgata Bibliorum Sacrorum Editio.