106 (Alleluja.) Confitemini Domino, quoniam bonus, quoniam in seculum misericordia ejus.
Alleluia confitemini Domino quoniam bonus quoniam in aeternum misericordia eius.
2 Quis loquetur potentias Domini ; auditas faciet omnes laudes ejus ?
Quis loquetur fortitudines Domini auditas faciet omnes laudes eius.
3 Beati qui custodiunt judicium, et faciunt justitiam in omni tempore !
Beati qui custodiunt iudicium et faciunt iustitiam in omni tempore.
4 Memento nostri, Domine, in beneplacito populi tui ; visita nos in salutari tuo ;
Recordare mei Domine in repropitiatione populi tui visita me in salutari tuo.
5 Ad videndum in bonitate electorum tuorum, ad lætandum in lætitia gentis tuæ, ut lauderis cum hæreditate tua.
Ut videam bona electorum tuorum et laeter in laetitia gentis tuae et exultem cum hereditate tua.
6 Peccavimus cum patribus nostris ; injuste egimus ; iniquitatem fecimus.
Peccavimus cum patribus nostris inique fecimus impie egimus.
7 Patres nostri in Ægypto non intellexerunt mirabilia tua ; non fuerunt memores multitudinis misericordiæ tuæ. Et irritaverunt ascendentes in mare, mare Rubrum.
Patres nostri in Aegypto non intellexerunt mirabilia tua non sunt recordati multitudinis misericordiae tuae et ad iracundiam provocaverunt super mare in mari Rubro.
8 Et salvavit eos propter nomen suum, ut notam faceret potentiam suam.
Salvavit autem eos propter nomen suum ut ostenderet fortitudinem suam.
9 Et increpuit mare Rubrum, et exsiccatum est ; et deduxit eos in abyssis, sicut in deserto.
Et comminatus est mari Rubro et aruit et transduxit eos per abyssos quasi in deserto.
10 Et salvavit eos de manu odientium, et redemit eos de manu inimici.
Et salvavit eos de manu odientis et redemit eos de manu inimici.
11 Et operuit aqua tribulantes eos ; unus ex eis non remansit.
Et operuit aqua hostes eorum unus de ipsis non superfuit.
12 Et crediderunt verbis ejus, et laudaverunt laudem ejus.
Et crediderunt verbis eius cecineruntque laudem eius.
13 Cito fecerunt ; obliti sunt operum ejus ; et non sustinuerunt consilium ejus.
Cito obliti sunt operum illius nec expectaverunt voluntatem eius.
14 Et concupierunt concupiscentiam in deserto, et tentaverunt Deum in inaquoso.
Et desideraverunt desiderium in deserto et temptaverunt Deum in solitudine.
15 Et dedit eis petitionem ipsorum, et misit saturitatem in animas eorum.
Dedit ergo eis petitionem eorum et misit tenuitatem in animam eorum.
16 Et irritaverunt Moysen in castris, Aaron, sanctum Domini.
Et zelati sunt Mosen in castris Aaron sanctum Domini.
17 Aperta est terra ; et deglutivit Dathan, et operuit super congregationem Abiron.
Aperta est terra et devoravit Dathan et operuit synagogam Abiram.
18 Et exarsit ignis in synagoga eorum, flamma combussit peccatores.
Et succensus est ignis in synagoga eorum flamma exusit impios.
19 Et fecerunt vitulum in Horeb, et adoraverunt sculptile.
Fecerunt vitulum in Horeb et adoraverunt conflatile.
20 Et mutaverunt gloriam suam in similitudinem vituli comedentis fœnum.
Et mutaverunt gloriam suam in similitudine bovis comedentis faenum.
21 Obliti sunt Deum qui salvavit eos, qui fecit magnalia in Ægypto,
Obliti sunt Dei salvatoris sui qui fecit magnalia in Aegypto.
22 Mirabilia in terra Cham, terribilia in mari Rubro.
Mirabilia in terra Ham terribilia super mare Rubrum.
23 Et dixit ut disperderet eos, si non Moyses, electus ejus, stetisset in confractione in conspectu ejus. Ut averteret iram ejus, ne disperderet eos ;
Dixit ergo ut contereret eos nisi Moses electus eius stetisset medius contra faciem illius ut converteret indignationem eius et non interficeret.
24 Et pro nihilo habuerunt terram desiderabilem. Non crediderunt verbo ejus.
Et dispexerunt terram desiderabilem nec crediderunt sermoni eius.
25 Et murmuraverunt in tabernaculis suis, non exaudierunt vocem Domini.
Et murmuraverunt in tabernaculis suis non audierunt vocem Domini.
26 Et elevavit manum suam super eos ut prosterneret eos in deserto.
Et levavit manum suam super eos ut deiceret eos in deserto.
27 Et ut dejiceret semen eorum in nationibus, et dispergeret eos in regionibus.
Et ut deiceret semen eorum in gentibus et dispergeret eos in terris.
28 Et initiati sunt Beelphegor, et comederunt sacrificia mortuorum.
Et consecrati sunt Beelphegor et comederunt victimas mortuorum.
29 Et irritaverunt eum in adinventionibus suis, et multiplicata est in eis ruina.
Et concitaverunt eum in studiis suis et percussit eos plaga.
30 Et stetit Phinees ; et placavit, et cessavit quassatio.
Stetit autem Finees et deiudicavit et est retenta percussio.
31 Et reputatum est ei in justitiam, in generationem et generationem usque in sempiternum.
Et reputatum est ei in iustitia in generatione et generatione usque in aeternum.
32 Et irritaverunt eum ad Aquas contradictionis ; et vexatus est Moyses propter eos,
Et provocaverunt super aquam Contradictionis et adflictus est Moses propter eos.
33 Quia exacerbaverunt spiritum ejus. Et distinxit in labiis suis.
Quia provocaverunt spiritum eius et praecepit labiis suis.
34 Non disperdiderunt gentes quas dixit Dominus illis ;
Non exterminaverunt populos quos dixit Dominus eis.
35 Et commisti sunt inter gentes ; et didicerunt opera eorum.
Et commixti sunt gentibus et didicerunt opera eorum.
36 Et servierunt sculptilibus eorum, et factum est illis in scandalum.
Et servierunt sculptilibus eorum et factum est eis in scandalum.
37 Et immolaverunt filios suos et filias suas dæmoniis.
Et immolaverunt filios suos et filias suas daemonibus.
38 Et effuderunt sanguinem innocentem, sanguinem filiorum suorum et filiarum suarum, quas sacrificaverunt sculptilibus Chanaan. Et infecta est terra in sanguinibus ;
Et effuderunt sanguinem innocentem sanguinem filiorum suorum et filiarum suarum quos immolaverunt sculptilibus Chanaan et polluta est terra sanguinibus.
39 Et contaminata est in operibus eorum, et fornicati sunt in adinventionibus suis.
Et coinquinati sunt in operibus suis et fornicati sunt in studiis suis.
40 Et iratus est furore Dominus in populum suum ; et abominatus est hæreditatem suam.
Iratus est itaque furor Domini in populum suum et abominatus est hereditatem suam.
41 Et tradidit eos in manus gentium ; et dominati sunt eorum qui oderunt eos.
Et dedit eos in manu gentium et dominati sunt eorum qui oderant eos.
42 Et tribulaverunt eos inimici eorum ; et humiliati sunt sub manibus eorum ;
Et adflixerunt eos inimici sui et humiliati sunt sub manu eorum.
43 Sæpe liberavit eos. Ipsi autem exacerbaverunt eum in consilio suo ; et humiliati sunt in iniquitatibus suis.
Multis vicibus liberavit eos ipsi vero provocabant in consiliis suis et humiliati sunt propter iniquitates suas.
44 Et vidit cum tribularentur, et audivit orationem eorum.
Et vidit tribulationem eorum cum audiret eos rogantes.
45 Et memor fuit testamenti sui ; et pœnituit eum secundum multitudinem misericordiæ suæ,
Et recordatus est pacti sui cum eis et paenituit eum secundum multitudinem misericordiae suae.
46 Et dedit eos in misericordias, in conspectu omnium qui ceperant eos.
Et dedit eos miserabiles coram omnibus qui ceperant eos.
47 Salvos nos fac, Domine Deus noster, et congrega nos de nationibus, ut confiteamur nomini sancto tuo, et gloriemur in laude tua.
Salva nos Domine Deus noster et congrega nos de gentibus ut confiteamur nomini sancto tuo et canamus laudantes te.
48 Benedictus Dominus Deus Israel, a seculo et usque in seculum ! et dicet omnis populus : Fiat ! fiat !
Benedictus Dominus Deus Israhel ab aeterno et usque in aeternum et dicet omnis populus amen alleluia.
Hieronymus Vulgata - Vide psalmum 105. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 105. || Nova Vulgata Bibliorum Sacrorum Editio.