Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER IV
 

(Versiculus)

104 (Ipsi David.) Benedic, anima mea, Domino. Domine Deus meus, magnificatus es vehementer. Confessionem et decorem induisti,

Benedic anima mea Domino Domine Deus meus magnificatus es nimis gloria et decore indutus es.

2 Amictus lumine sicut vestimento ; extendens cælum sicut pellem,

Amictus luce quasi vestimento extendens caelos ut pellem.

3 Qui tegis aquis superiora ejus ; qui ponis nubem ascensum tuum, qui ambulas super pennas ventorum ;

Qui tegis aquis cenacula eius qui ponis nubes currum tuum qui ambulas super pinnas venti.

4 Qui facis angelos tuos spiritus, et ministros tuos ignem urentem ;

Qui facis angelos tuos spiritus ministros tuos ignem urentem.

5 Qui fundasti terram super stabilitatem suam, non inclinabitur in seculum seculi.

Qui fundasti terram super basem suam non commovebitur in saeculum et in saeculum.

6 Abyssus sicut vestimentum amictus ejus ; super montes stabunt aquæ.

Abysso quasi vestimento operuisti eam super montes stabunt aquae.

7 Ab increpatione tua fugient, a voce tonitrui tui formidabunt.

Ab increpatione tua fugient a voce tonitrui tui formidabunt.

8 Ascendunt montes, et descendunt campi, in locum quem fundasti eis.

Ascendent montes et descendent campi ad locum quem fundasti eis.

9 Terminum posuisti quem non transgredientur ; neque convertentur operire terram.

Terminum posuisti quem non pertransibunt nec revertentur ut operiant terram.

10 Qui emittis fontes in convallibus ; inter medium montium pertransibunt aquæ.

Qui emittis fontes in convallibus ut inter medios montes fluant.

11 Potabunt omnes bestiæ agri ; expectabunt onagri in siti sua.

Ut bibant omnia animalia regionum et reficiat onager sitim suam.

12 Super ea volucres cæli habitabunt ; de medio petrarum dabunt voces.

Super ea volucres caeli morabuntur de medio nemorum dabunt vocem.

13 Rigans montes de superioribus suis ; de fructu operum tuorum satiabitur terra ;

Qui inrigas montes de cenaculis tuis de fructu operum tuorum implebitur terra.

14 Producens fœnum jumentis, et herbam servituti hominum ; ut educas panem de terra,

Germinans herbam iumentis et faenum servituti hominum ut educat panem de terra.

15 Et vinum lætificet cor hominis ; ut exhilaret faciem in oleo ; et panis cor hominis confirmet.

Et vinum laetificat cor hominis ad exhilarandam faciem oleo panis autem cor hominis roborat.

16 Saturabuntur ligna campi, et cedri Libani quas plantavit ;

Saturabuntur ligna Domini cedri Libani quas plantasti.

17 Illic passeres nidificabunt. Herodii domus dux est eorum ;

Ibi aves nidificabunt milvo abies domus eius.

18 Montes excelsi cervis, petra refugium herinaciis.

Montes excelsi cervis petra refugium ericiis.

19 Fecit lunam in tempora ; sol cognovit occasum suum.

Fecit lunam per tempora sol cognovit occubitum suum.

20 Posuisti tenebras, et facta est nox ; in ipsa pertransibunt omnes bestiæ silvæ.

Posuisti tenebras et facta est nox in ipsa moventur omnes bestiae silvae.

21 Catuli leonum rugientes ut rapiant, et quærant a Deo escam sibi.

Leones rugientes ad praedam et quaerentes a Deo escam sibi.

22 Ortus est sol, et congregati sunt, et in cubilibus suis collocabuntur.

Oriente sole recedent et in speluncis suis cubabunt.

23 Exibit homo ad opus suum, et ad operationem suam usque ad vesperum.

Egreditur homo ad opus suum et ad servitutem suam usque ad vesperam.

24 Quam magnificata sunt opera tua, Domine ! Omnia in sapientia fecisti ; impleta est terra possessione tua.

Quam multa sunt opera tua Domine omnia in sapientia fecisti impleta est terra possessione tua.

25 Hoc mare magnum et spatiosum manibus ! Illic reptilia quorum non est numerus, animalia pusilla cum magnis ;

Hoc mare magnum et latum manibus ibi reptilia innumerabilia animalia parva cum grandibus.

26 Illic naves pertransibunt. Draco iste quem formasti ad illudendum ei.

Ibi naves pertranseunt Leviathan istum plasmasti ut inluderet ei.

27 Omnia a te expectant ut des illis escam in tempore.

Omnia in te sperant ut des cibum eis in tempore suo.

28 Dante te illis, colligent ; aperiente te manum tuam, omnia implebuntur bonitate.

Dante te illis colligent aperiente manum tuam replebuntur bono.

29 Avertente autem te faciem, turbabuntur ; auferes spiritum eorum ; et deficient, et in pulverem suum revertentur.

Abscondes vultum tuum et turbabuntur auferes spiritum eorum et deficient et in pulverem suum revertentur.

30 Emittes spiritum tuum, et creabuntur ; et renovabis faciem terræ.

Emittes spiritum tuum et creabuntur et instaurabis faciem terrae.

31 Sit gloria Domini in seculum ! Lætabitur Dominus in operibus suis ;

Sit gloria Domini in sempiternum laetabitur Dominus in operibus suis.

32 Qui respicit terram, et facit eam tremere ; qui tangit montes, et fumigant.

Qui respicit terram et tremet tangit montes et fumabunt.

33 Cantabo Domino in vita mea ; psallam Deo meo quamdiu sum.

Cantabo Domino in vita mea psallam Deo quamdiu sum.

34 Jucundum sit ei eloquium meum ! ego vero delectabor in Domino.

Placeat ei eloquium meum ego autem laetabor in Domino.

35 Deficiant peccatores a terra, et iniqui, ita ut non sint ! Benedic, anima mea, Domino.

Deficiant peccatores de terra et impii ultra non sint benedic anima mea Domino.



Hieronymus Vulgata - Vide psalmum 103. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 103. || Nova Vulgata Bibliorum Sacrorum Editio.

spacer 


Aperit