Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum

LIBER I
 

(Versiculus)

9 (In finem pro occultis filii. n Psalmus David.) Confitebor tibi, Domine, in toto corde meo ; narrabo omnia mirabilia tua.

Victori pro morte filii canticum David. Confitebor Domino in toto corde meo narrabo omnia mirabilia tua.

2 Lætabor et exsultabo in te ; psallam nomini tuo, Altissime.

Laetabor et gaudebo in te canam nomini tuo Altissimi.

3 In convertendo inimicum meum retrorsum ; infirmabuntur, et peribunt a facie tua.

Cum ceciderint inimici mei retrorsum et corruerint et perierint a facie tua.

4 Quoniam fecisti judicium meum et causam meam ; sedisti super thronum, qui judicas justitiam.

Fecisti enim iudicium meum et causam meam sedisti super solium iudex iustitiae.

5 Increpasti gentes, et periit impius. Nomen eorum delesti in æternum, et in seculum seculi.

Increpuisti gentes periit impius nomen eorum delisti in sempiternum et iugiter.

6 Inimici defecerunt frameæ in finem, et civitates eorum destruxisti. Periit memoria eorum cum sonitu ;

Conpletae sunt solitudines in finem et civitates subvertisti periit memoria eorum cum ipsis.

7 Et Dominus in æternum permanet. Paravit in judicio thronum suum,

Dominus autem in sempiternum sedebit stabilivit ad iudicandum solium suum.

8 Et ipse judicabit orbem terræ in æquitate, judicabit populos in justitia.

Et ipse iudicat orbem in iustitia iudicat populos in aequitatibus.

9 Et factus est Dominus refugium pauperi ; adjutor in opportunitatibus, in tribulatione.

Et erit Dominus elevatio oppresso elevatio oportuna in angustia.

10 Et sperent in te qui noverunt nomen tuum, quoniam non dereliquisti quærentes te, Domine.

Et confident in te qui noverunt nomen tuum quoniam non dereliquisti quaerentes te Domine.

11 Psallite Domino qui habitat in Sion ; annuntiate inter gentes studia ejus ;

Cantate Domino habitatori Sion adnuntiate in populis commutationes eius.

12 Quoniam requirens sanguinem eorum recordatus est ; non est oblitus clamorem pauperum.

Quoniam quaerens sanguinem eorum recordatus est nec oblitus est clamoris pauperum.

13 Miserere mei, Domine ; vide humilitatem meam de inimicis meis,

Misertus est mei Dominus vidit adflictionem meam ex inimicis meis.

14 Qui exaltas me de portis mortis, ut annuntiem omnes laudationes tuas in portis filiæ Sion.

Qui exaltat me de portis mortis ut narrem omnes laudes tuas in portis filiae Sion.

15 Exsultabo in salutari tuo. Infixæ sunt gentes in interitu quem fecerunt ; in laqueo isto quem absconderunt comprehensus est pes eorum.

Exultabo in salutari tuo demersae sunt gentes in interitu quem fecerunt in rete quod absconderant captus est pes eorum.

16 Cognoscetur Dominus judicia faciens. In operibus manuum suarum comprehensus est peccator.

Agnitus est Dominus iudicium faciens in opere manuum suarum corruit impius sonitu sempiterno.

17 Convertantur peccatores in infernum, omnes gentes quæ obliviscuntur Deum.

Convertantur impii in infernum omnes gentes quae oblitae sunt Deum.

18 Quoniam non in finem oblivio erit pauperis ; patientia pauperum non peribit in finem.

Quoniam non in aeternum oblivioni erit pauper expectatio pauperum non peribit in perpetuum.

19 Exsurge, Domine ; non confortetur homo ; judicentur gentes in conspectu tuo.

Surge Domine non confortetur homo iudicentur gentes ante faciem tuam.

20 Constitue, Domine, legislatorem super eos, ut sciant gentes quoniam homines sunt.

Pone Domine terrorem eis sciant gentes homines se esse semper.



Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.

spacer 


Aperit