8 (In finem pro torcularibus. n Psalmus David.) Domine, Dominus noster, quam admirabile est nomen tuum in universa terra ! Quoniam elevata est magnificentia tua super cælos.
Victori pro torcularibus canticum David. Domine Dominator noster quam grande est nomen tuum in universa terra qui posuisti gloriam tuam super caelos.
2 Ex ore infantium et lactentium perfecisti laudem propter inimicos tuos, ut destruas inimicum et ultorem.
Ex ore infantium et lactantium perfecisti laudem propter adversarios meos ut quiescat inimicus et ultor.
3 Quoniam videbo cælos tuos, opera digitorum tuorum, lunam et stellas quæ tu fundasti.
Videbo enim caelos tuos opera digitorum tuorum lunam et stellas quae fundasti.
4 Quid est homo, quod memor es ejus ? aut filius hominis, quoniam visitas eum ?
Quid est homo quoniam recordaris eius vel filius hominis quoniam visitas eum.
5 Minuisti eum paulominus ab angelis ; gloria et honore coronasti eum ;
Minues eum paulo minus a Deo gloria et decore coronabis eum.
6 Et constituisti eum super opera manuum tuarum.
Dabis ei potestatem super opera manuum tuarum.
7 Omnia subjecisti sub pedibus ejus, oves et boves universas, insuper et pecora campi,
Cuncta posuisti sub pedibus eius oves et armenta omnia insuper et animalia agri.
8 Volucres cæli, et pisces maris, qui perambulant semitas maris.
Aves caeli et pisces maris qui pertranseunt semitas ponti.
9 Domine, Dominus noster, quam admirabile est nomen tuum in universa terra !
Domine Dominator noster quam grande est nomen tuum in universa terra.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.