Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Numeri

(Versiculus)

23 Dixitque Balaam ad Balac : Ædifica mihi hic septem aras, et para totidem vitulos, ejusdemque numeri arietes.

Dixitque Balaam ad Balac aedifica mihi hic septem aras et para totidem vitulos eiusdemque numeri arietes.

2 Cumque fecisset juxta sermonem Balaam, imposuerunt simul vitulum et arietem super aram.

Cumque fecisset iuxta sermonem Balaam inposuerunt simul vitulum et arietem super aram.

3 Dixitque Balaam ad Balac : Sta paulisper juxta holocaustum tuum, donec vadam, si forte occurrat mihi Dominus, et quodcumque imperaverit, loquar tibi.

Dixitque Balaam ad Balac sta paulisper iuxta holocaustum tuum donec vadam si forte occurrat mihi Dominus et quodcumque imperaverit loquar tibi.

4 Cumque abiisset velociter, occurrit illi Deus. Locutusque ad eum Balaam : Septem, inquit, aras erexi, et imposui vitulum et arietem desuper.

Cumque abisset velociter occurrit ei Deus locutusque ad eum Balaam septem inquit aras erexi et inposui vitulum et arietem desuper.

5 Dominus autem posuit verbum in ore ejus, et ait : Revertere ad Balac, et hæc loqueris.

Dominus autem posuit verbum in ore eius et ait revertere ad Balac et haec loqueris.

6 Reversus invenit stantem Balac juxta holocaustum suum, et omnes principes Moabitarum ;

Reversus invenit stantem Balac iuxta holocaustum suum et omnes principes Moabitarum.

7 Assumptaque parabola sua, dixit : De Aram adduxit me Balac rex Moabitarum, de montibus Orientis : Veni, inquit, et maledic Jacob ; propera, et detestare Israel.

Adsumptaque parabola sua dixit de Aram adduxit me Balac rex Moabitarum de montibus orientis veni inquit et maledic Iacob propera et detestare Israhel.

8 Quomodo maledicam, cui non maledixit Deus ? Qua ratione detester, quem Dominus non detestatur ?

Quomodo maledicam cui non maledixit Deus qua ratione detester quem Dominus non detestatur.

9 De summis silicibus videbo eum, et de collibus considerabo illum ; populus solus habitabit, et inter gentes non reputabitur.

De summis silicibus videbo eum et de collibus considerabo illum populus solus habitabit et inter gentes non reputabitur.

10 Quis dinumerare possit pulverem Jacob, et nosse numerum stirpis Israel ? Moriatur anima mea morte justorum, et fiant novissima mea horum similia.

Quis dinumerare possit pulverem Iacob et nosse numerum stirpis Israhel moriatur anima mea morte iustorum et fiant novissima mea horum similia.

11 Dixitque Balac ad Balaam : Quid est hoc quod agis ? Ut malediceres inimicis meis vocavi te ; et tu e contrario benedicis eis !

Dixitque Balac ad Balaam quid est hoc quod agis ut malediceres inimicis vocavi te et tu e contrario benedicis eis.

12 Cui ille respondit : Num aliud possum loqui, nisi quod jusserit Dominus ?

Cui ille respondit num aliud possum loqui nisi quod iusserit Dominus.

13 Dixit ergo Balac : Veni mecum in alterum locum, unde partem Israel videas, et totum videre non possis, inde maledicito ei.

Dixit ergo Balac veni mecum in alterum locum unde partem Israhelis videas et totum videre non possis inde maledicito ei.

14 Cumque duxisset eum in locum sublimem, super verticem montis Phasga, ædificavit Balaam septem aras, et impositis supra vitulo atque ariete,

Cumque duxisset eum in locum sublimem super verticem montis Phasga aedificavit Balaam septem aras et inpositis supra vitulo atque ariete.

15 Dixit ad Balac : Sta hic juxta holocaustum tuum, donec ego obvius pergam.

Dixit ad Balac sta hic iuxta holocaustum tuum donec ego pergam obvius.

16 Cui cum Dominus occurrisset, posuissetque verbum in ore ejus, ait : Revertere ad Balac, et hæc loqueris ei.

Cui cum Dominus occurrisset posuissetque verbum in ore eius ait revertere ad Balac et haec loqueris ei.

17 Reversus invenit eum stantem juxta holocaustum suum, et principes Moabitarum cum eo. Ad quem Balac : Quid, inquit, locutus est Dominus ?

Reversus invenit eum stantem iuxta holocaustum suum et principes Moabitarum cum eo ad quem Balac quid inquit locutus est Dominus.

18 At ille, assumpta parabola sua, ait : Sta, Balac, et ausculta ; audi, fili Sephor :

At ille adsumpta parabola sua ait sta Balac et ausculta audi fili Sepphor.

19 Non est Deus quasi homo, ut mentiatur, nec ut filius hominis, ut mutetur. Dixit ergo, et non faciet ? locutus est, et non implebit ?

Non est Deus quasi homo ut mentiatur nec ut filius hominis ut mutetur dixit ergo et non faciet locutus est et non implebit.

20 Ad benedicendum adductus sum ; benedictionem prohibere non valeo.

Ad benedicendum adductus sum benedictionem prohibere non valeo.

21 Non est idolum in Jacob, nec videtur simulacrum in Israel. Dominus Deus ejus cum eo est, et clangor victoriæ regis in illo.

Non est idolum in Iacob nec videtur simulacrum in Israhel Dominus Deus eius cum eo est et clangor victoriae regis in illo.

22 Deus eduxit illum de Ægypto, cujus fortitudo similis est rhinocerotis.

Deus eduxit eum de Aegypto cuius fortitudo similis est rinocerotis.

23 Non est augurium in Jacob, nec divinatio in Israel. Temporibus suis dicetur Jacob et Israeli quid operatus sit Deus.

Non est augurium in Iacob nec divinatio in Israhel temporibus suis dicetur Iacob et Israheli quid operatus sit Deus.

24 Ecce populus ut leæna consurget, et quasi leo erigetur ; non accubabit donec devoret prædam, et occisorum sanguinem bibat.

Ecce populus ut leaena consurget et quasi leo erigetur non accubabit donec devoret praedam et occisorum sanguinem bibat.

25 Dixitque Balac ad Balaam : Nec maledicas ei, nec benedicas.

Dixitque Balac ad Balaam nec maledicas ei nec benedicas.

26 Et ille ait : Nonne dixi tibi quod quidquid mihi Deus imperaret, hoc facerem ?

Et ille nonne ait dixi tibi quod quicquid mihi Deus imperaret hoc facerem.

27 Et ait Balac ad eum : Veni, et ducam te ad alium locum, si forte placeat Deo ut inde maledicas eis.

Et ait Balac ad eum veni et ducam te ad alium locum si forte placeat Deo ut inde maledicas eis.

28 Cumque duxisset eum super verticem montis Phogor, qui respicit solitudinem,

Cumque duxisset eum super verticem montis Phogor qui respicit solitudinem.

29 Dixit ei Balaam : Ædifica mihi hic septem aras, et para totidem vitulos, ejusdemque numeri arietes.

Dixit ei Balaam aedifica mihi hic septem aras et para totidem vitulos eiusdemque numeri arietes.

30 Fecit Balac ut Balaam dixerat ; imposuitque vitulos et arietes per singulas aras.

Fecit Balac ut Balaam dixerat inposuitque vitulos et arietes per singulas aras.



Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.

spacer 


Aperit