24 Cumque vidisset Balaam quod placeret Domino ut benediceret Israeli, nequaquam abiit ut ante perrexerat, ut augurium quæreret ; sed dirigens contra desertum vultum suum,
Cumque vidisset Balaam quod placeret Domino ut benediceret Israheli nequaquam abiit ut ante perrexerat ut augurium quaereret sed dirigens contra desertum vultum suum.
2 Et elevans oculos, vidit Israel in tentoriis commorantem per tribus suas ; et irruente in se spiritu Dei,
Et elevans oculos vidit Israhel in tentoriis commorantem per tribus suas et inruente in se spiritu Dei.
3 Assumpta parabola ait : Dixit Balaam, filius Beor ; dixit homo, cujus obturatus est oculus ;
Adsumpta parabola ait dixit Balaam filius Beor dixit homo cuius obturatus est oculus.
4 Dixit auditor sermonum Dei, qui visionem Omnipotentis intuitus est, qui cadit, et sic aperiuntur oculi ejus :
Dixit auditor sermonum Dei qui visionem Omnipotentis intuitus est qui cadit et sic aperiuntur oculi eius.
5 Quam pulchra tabernacula tua, Jacob ! et tentoria tua, Israel !
Quam pulchra tabernacula tua Iacob et tentoria tua Israhel.
6 Ut valles nemorosæ, ut horti juxta fluvios irrigui, ut tabernacula quæ fixit Dominus, quasi cedri prope aquas.
Ut valles nemorosae ut horti iuxta fluvios inrigui ut tabernacula quae fixit Dominus quasi cedri propter aquas.
7 Fluet aqua de situla ejus, et semen illius erit in aquas multas. Tolletur propter Agag, rex ejus, et auferetur regnum illius.
Fluet aqua de situla eius et semen illius erit in aquas multas tolletur propter Agag rex eius et auferetur regnum illius.
8 Deus eduxit illum de Ægypto, cujus fortitudo similis est rhinocerotis. Devorabunt gentes hostes illius, ossaque eorum confringent, et perforabunt sagittis.
Deus eduxit illum de Aegypto cuius fortitudo similis est rinocerotis devorabunt gentes hostes illius ossaque eorum confringent et perforabunt sagittis.
9 Accubans dormivit ut leo, et quasi leæna, quam suscitare nullus audebit. Qui benedixerit tibi, erit et ipse benedictus ; qui maledixerit, in maledictione reputabitur.
Accubans dormivit ut leo et quasi leaena quam suscitare nullus audebit qui benedixerit tibi erit ipse benedictus qui maledixerit in maledictione reputabitur.
10 Iratusque Balac contra Balaam, complosis manibus, ait : Ad maledicendum inimicis meis vocavi te, quibus e contrario tertio benedixisti :
Iratusque Balac contra Balaam conplosis manibus ait ad maledicendum inimicis meis vocavi te quibus e contrario tertio benedixisti.
11 Revertere ad locum tuum. Decreveram quidem magnifice honorare te ; sed Dominus privavit te honore disposito.
Revertere ad locum tuum decreveram quidem magnifice honorare te sed Dominus privavit te honore disposito.
12 Respondit Balaam ad Balac : Nonne nuntiis tuis, quos misisti ad me, dixi :
Respondit Balaam ad Balac nonne nuntiis tuis quos misisti ad me dixi.
13 Si dederit mihi Balac plenam domum suam argenti et auri, non potero præterire sermonem Domini Dei mei, ut vel boni quid, vel mali proferam ex corde meo ; sed quidquid Dominus dixerit, hoc loquar ?
Si dederit mihi Balac plenam domum suam argenti et auri non potero praeterire sermonem Domini Dei mei ut vel boni quid vel mali proferam ex corde meo sed quicquid Dominus dixerit hoc loquar.
14 Verumtamen pergens ad populum meum, dabo consilium, quid populus tuus populo huic faciat extremo tempore.
Verumtamen pergens ad populum meum dabo consilium quid populus tuus huic populo faciat extremo tempore.
15 Sumpta igitur parabola, rursum ait : Dixit Balaam, filius Beor ; dixit homo, cujus obturatus est oculus ;
Sumpta igitur parabola rursum ait dixit Balaam filius Beor dixit homo cuius obturatus est oculus.
16 Dixit auditor sermonum Dei, qui novit doctrinam Altissimi, et visiones Omnipotentis videt, qui cadens apertos habet oculos :
Dixit auditor sermonum Dei qui novit doctrinam Altissimi et visiones Omnipotentis videt qui cadens apertos habet oculos.
17 Videbo eum, sed non modo ; intuebor illum, sed non prope. ORIETUR STELLA ex Jacob, et consurget virga de Israel ; et percutiet duces Moab, vastabitque omnes filios Seth.
Videbo eum sed non modo intuebor illum sed non prope orietur stella ex Iacob et consurget virga de Israhel et percutiet duces Moab vastabitque omnes filios Seth.
18 Et erit Idumæa possessio ejus ; hæreditas Seir cedet inimicis suis ; Israel vero fortiter aget.
Et erit Idumea possessio eius hereditas Seir cedet inimicis suis Israhel vero fortiter aget.
19 De Jacob erit qui dominetur, et perdat reliquias civitatis.
De Iacob erit qui dominetur et perdat reliquias civitatis.
20 Cumque vidisset Amalec, assumens parabolam, ait : Principium gentium Amalec, cujus extrema perdentur.
Cumque vidisset Amalech adsumens parabolam ait principium gentium Amalech cuius extrema perdentur.
21 Vidit quoque Cinæum ; et, assumpta parabola, ait : Robustum quidem est habitaculum tuum ; sed si in petra posueris nidum tuum,
Vidit quoque Cineum et adsumpta parabola ait robustum est quidem habitaculum tuum sed si in petra posueris nidum tuum.
22 et fueris electus de stirpe Cin, quamdiu poteris permanere ? Assur enim capiet te.
Et fueris electus de stirpe Cain quamdiu poteris permanere Assur enim capiet te.
23 Assumptaque parabola iterum locutus est : Heu ! quis victurus est, quando ista faciet Deus ?
Adsumptaque parabola iterum locutus est heu quis victurus est quando ista faciet Deus.
24 Venient in trieribus de Italia, superabunt Assyrios, vastabuntque Hebræos, et ad extremum etiam ipsi peribunt.
Venient in trieribus de Italia superabunt Assyrios vastabuntque Hebraeos et ad extremum etiam ipsi peribunt.
25 Surrexitque Balaam, et reversus est in locum suum ; Balac quoque via, qua venerat, rediit.
Surrexitque Balaam et reversus est in locum suum Balac quoque via qua venerat rediit.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.