22 Profectique castrametati sunt in campestribus Moab, ubi trans Jordanem Jericho sita est.
Profectique castrametati sunt in campestribus Moab ubi trans Iordanem Hierichus sita est.
2 Videns autem Balac, filius Sephor, omnia quæ fecerat Israel Amorrhæo,
Videns autem Balac filius Sepphor omnia quae fecerat Israhel Amorreo.
3 Et quod pertimuissent eum Moabitæ, et impetum ejus ferre non possent,
Et quod pertimuissent eum Moabitae et impetum eius ferre non possent.
4 Dixit ad majores natu Madian : Ita delebit hic populus omnes, qui in nostris finibus commorantur, quomodo solet bos herbas usque ad radices carpere. Ipse erat eo tempore rex in Moab.
Dixit ad maiores natu Madian ita delebit hic populus omnes qui in nostris finibus commorantur quomodo solet bos herbas usque ad radices carpere ipse erat eo tempore rex in Moab.
5 Misit ergo nuntios ad Balaam filium Beor ariolum, qui habitabat super flumen terræ filiorum Ammon, ut vocarent eum, et dicerent : Ecce egressus est populus ex Ægypto, qui operuit superficiem terræ, sedens contra me.
Misit ergo nuntios ad Balaam filium Beor ariolum qui habitabat super flumen terrae filiorum Ammon ut vocarent eum et dicerent ecce egressus est populus ex Aegypto qui operuit superficiem terrae sedens contra me.
6 Veni igitur, et maledic populo huic, quia fortior me est ; si quomodo possim percutere et ejicere eum de terra mea ; novi enim quod benedictus sit cui benedixeris, et maledictus in quem maledicta congesseris.
Veni igitur et maledic populo huic quia fortior me est si quo modo possim percutere et eicere eum de terra mea novi enim quod benedictus sit cui benedixeris et maledictus in quem maledicta congesseris.
7 Perrexeruntque seniores Moab, et majores natu Madian, habentes divinationis pretium in manibus ; cumque venissent ad Balaam, et narrassent ei omnia verba Balac ;
Perrexerunt seniores Moab et maiores natu Madian habentes divinationis pretium in manibus cumque venissent ad Balaam et narrassent ei omnia verba Balac.
8 Ille respondit : Manete hic nocte, et respondebo quidquid mihi dixerit Dominus. Manentibus illis apud Balaam, venit Deus, et ait ad eum :
Ille respondit manete hic nocte et respondebo quicquid mihi dixerit Dominus manentibus illis apud Balaam venit Deus et ait ad eum.
9 Quid sibi volunt homines isti apud te ?
Quid sibi volunt homines isti apud te.
10 Respondit : Balac, filius Sephor, rex Moabitarum, misit ad me,
Respondit Balac filius Sepphor rex Moabitarum misit ad me.
11 Dicens : Ecce populus qui egressus est de Ægypto, operuit superficiem terræ ; veni, et maledic ei, si quomodo possim pugnans abigere eum.
Dicens ecce populus qui egressus est de Aegypto operuit superficiem terrae veni et maledic ei si quo modo possim pugnans abicere eum.
12 Dixitque Deus ad Balaam : Noli ire cum eis, neque maledicas populo, quia benedictus est.
Dixitque Deus ad Balaam noli ire cum eis neque maledicas populo quia benedictus est.
13 Qui mane consurgens dixit ad principes : Ite in terram vestram, quia prohibuit me Dominus venire vobiscum.
Qui mane consurgens dixit ad principes ite in terram vestram quia prohibuit me Deus venire vobiscum.
14 Reversi principes dixerunt ad Balac : Noluit Balaam venire nobiscum.
Reversi principes dixerunt ad Balac noluit Balaam venire nobiscum.
15 Rursum ille multo plures et nobiliores quam ante miserat, misit ;
Rursum ille multo plures et nobiliores quam ante miserat misit.
16 Qui cum venissent ad Balaam, dixerunt : Sic dicit Balac, filius Sephor : Ne cuncteris venire ad me ;
Qui cum venissent ad Balaam dixerunt sic dicit Balac filius Sepphor ne cuncteris venire ad me.
17 Paratus sum honorare te, et quidquid volueris dabo tibi ; veni, et maledic populo isti.
Paratum honorare te et quicquid volueris dare veni et maledic populo isti.
18 Respondit Balaam : Si dederit mihi Balac plenam domum suam argenti et auri, non potero immutare verbum Domini Dei mei, ut vel plus, vel minus loquar.
Respondit Balaam si dederit mihi Balac plenam domum suam argenti et auri non potero inmutare verbum Domini Dei mei ut vel plus vel minus loquar.
19 Obsecro ut hic maneatis etiam hac nocte, et scire queam quid mihi rursum respondeat Dominus.
Obsecro ut hic maneatis etiam hac nocte et scire queam quid mihi rursum respondeat Dominus.
20 Venit ergo Deus ad Balaam nocte, et ait ei : Si vocare te venerunt homines isti, surge, et vade cum eis ; ita dumtaxat, ut quod tibi præcepero, facias.
Venit ergo Deus ad Balaam nocte et ait ei si vocare te venerunt homines isti surge et vade cum eis ita dumtaxat ut quod tibi praecepero facias.
21 Surrexit Balaam mane, et strata asina sua profectus est cum eis.
Surrexit Balaam mane et strata asina profectus est cum eis.
22 Et iratus est Deus. Stetitque angelus Domini in via contra Balaam, qui insidebat asinæ, et duos pueros habebat secum.
Et iratus est Deus stetitque angelus Domini in via contra Balaam qui sedebat asinae et duos pueros habebat secum.
23 Cernens asina angelum stantem in via, evaginato gladio, avertit se de itinere, et ibat per agrum. Quam cum verberaret Balaam, et vellet ad semitam reducere,
Cernens asina angelum stantem in via evaginato gladio avertit se de itinere et ibat per agrum quam cum verberaret Balaam et vellet ad semitam reducere.
24 Stetit angelus in angustiis duarum maceriarum, quibus vineæ cingebantur.
Stetit angelus in angustiis duarum maceriarum quibus vineae cingebantur.
25 Quem videns asina, junxit se parieti, et attrivit sedentis pedem. At ille iterum verberabat eam ;
Quem videns asina iunxit se parieti et adtrivit sedentis pedem at ille iterum verberabat.
26 Et nihilominus angelus ad locum angustum transiens, ubi nec ad dexteram, nec ad sinistram poterat deviare, obvius stetit.
Et nihilominus angelus ad locum angustum transiens ubi nec ad dextram nec ad sinistram poterat deviari obvius stetit.
27 Cumque vidisset asina stantem angelum, concidit sub pedibus sedentis, qui iratus, vehementius cædebat fuste latera ejus.
Cumque vidisset asina stantem angelum concidit sub pedibus sedentis qui iratus vehementius caedebat fuste latera.
28 Aperuitque Dominus os asinæ, et locuta est : Quid feci tibi ? cur percutis me ? ecce jam tertio ?
Aperuitque Dominus os asinae et locuta est quid feci tibi cur percutis me ecce iam tertio.
29 Respondit Balaam : Quia commeruisti, et illusisti mihi. Utinam haberem gladium, ut te percuterem !
Respondit Balaam quia commeruisti et inlusisti mihi utinam haberem gladium ut te percuterem.
30 Dixit asina : Nonne animal tuum sum, cui semper sedere consuevisti usque in præsentem diem ? dic quid simile umquam fecerim tibi. At ille ait : Nunquam.
Dixit asina nonne animal tuum sum cui semper sedere consuesti usque in praesentem diem dic quid simile umquam fecerim tibi at ille ait numquam.
31 Protinus aperuit Dominus oculos Balaam, et vidit angelum stantem in via, evaginato gladio ; adoravitque eum pronus in terram.
Protinus aperuit Dominus oculos Balaam et vidit angelum stantem in via evaginato gladio adoravitque eum pronus in terram.
32 Cui angelus : Cur, inquit, tertio verberas asinam tuam ? Ego veni ut adversarer tibi, quia perversa est via tua, mihique contraria ;
Cui angelus cur inquit tertio verberas asinam tuam ego veni ut adversarer tibi quia perversa est via tua mihique contraria.
33 Et nisi asina declinasset de via, dans locum resistenti, te occidissem, et illa viveret
Et nisi asina declinasset de via dans locum resistenti te occidissem et illa viveret.
34 Dixit Balaam : Peccavi, nesciens quod tu stares contra me ; et nunc, si displicet tibi ut vadam, revertar.
Dixit Balaam peccavi nesciens quod tu stares contra me et nunc si displicet tibi ut vadam revertar.
35 Ait angelus : Vade cum istis, et cave ne aliud quam præcepero tibi loquaris. Ivit igitur cum principibus.
Ait angelus vade cum istis et cave ne aliud quam praecepero tibi loquaris ivit igitur cum principibus.
36 Quod cum audisset Balac, egressus est in occursum ejus in oppido Moabitarum, quod situm est in extremis finibus Arnon ;
Quod cum audisset Balac egressus est in occursum eius in oppido Moabitarum quod situm est in extremis finibus Arnon.
37 Dixitque ad Balaam : Misi nuntios ut vocarent te ; cur non statim venisti ad me ? an quia mercedem adventui tuo reddere nequeo ?
Dixitque ad Balaam misi nuntios ut vocarent te cur non statim venisti ad me an quia mercedem adventui tuo reddere nequeo.
38 Cui ille respondit : Ecce adsum ; numquid loqui potero aliud, nisi quod Deus posuerit in ore meo ?
Cui ille respondit ecce adsum numquid loqui potero aliud nisi quod Deus posuerit in ore meo.
39 Perrexerunt ergo simul, et venerunt in urbem, quæ in extremis regni ejus finibus erat.
Perrexerunt ergo simul et venerunt in urbem quae in extremis regni eius finibus erat.
40 Cumque occidisset Balac boves et oves, misit ad Balaam, et principes qui cum eo erant, munera.
Cumque occidisset Balac boves et oves misit ad Balaam et principes qui cum eo erant munera.
41 Mane autem facto, duxit eum ad excelsa Baal, et intuitus est extremam partem populi.
Mane autem facto duxit eum ad excelsa Baal et intuitus est extremam partem populi.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.