Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Ezechielis

(Versiculus)

17 Et factum est verbum Domini ad me, dicens :

Et factum est verbum Domini ad me dicens.

2 Fili hominis propone ænigma, et narra parabolam ad domum Israel,

Fili hominis propone enigma et narra parabolam ad domum Israhel.

3 Et dices : Hæc dicit Dominus Deus : Aquila grandis magnarum alarum, longo membrorum ductu, plena plumis et varietate, venit ad Libanum, et tulit medullam cedri.

Et dices haec dicit Dominus Deus aquila grandis magnarum alarum longo membrorum ductu plena plumis et varietate venit ad Libanum et tulit medullam cedri.

4 Summitatem frondium ejus avulsit ; et transportavit eam in terram Chanaan, in urbe negotiatorum posuit illam.

Summitatem frondium eius avellit et transportavit eam in terram Chanaan in urbem negotiatorum posuit illam.

5 Et tulit de semine terræ, et posuit illud in terra pro semine, ut firmaret radicem super aquas multas ; in superficie posuit illud.

Et tulit de semente terrae et posuit illud in terra pro semine ut firmaret radicem super aquas multas in superficie posuit illud.

6 Cumque germinasset, crevit in vineam latiorem humili statura, respicientibus ramis ejus ad eam ; et radices ejus sub illa erant ; facta est ergo vinea, et fructificavit in palmites, et emisit propagines.

Cumque germinasset crevit in vineam latiorem humili statura respicientibus ramis eius ad eam et radices eius sub illa erunt facta est ergo vinea et fructificavit in palmites et emisit propagines.

7 Et facta est aquila altera grandis magnis alis, multisque plumis ; et ecce vinea ista quasi mittens radices suas ad eam, palmites suos extendit ad illam, ut irrigaret eam de areolis germinis sui.

Et facta est aquila altera grandis magnis alis multisque plumis et ecce vinea ista quasi mittens radices suas ad eam palmites suos extendit ad illam ut inrigaret eam de areolis germinis sui.

8 In terra bona super aquas multas plantata est ; ut faciat frondes, et portet fructum, ut sit in vineam grandem.

In terra bona super aquas multas plantata est ut faciat frondes et portet fructum et sit in vineam grandem.

9 Dic : Hæc dicit Dominus Deus : Ergone prosperabitur ? Nonne radices ejus evellet, et fructus ejus distringet, et siccabit omnes palmites germinis ejus, et arescet ; et non in brachio grandi, neque in populo multo, ut evelleret eam radicitus ?

Dic haec dicit Dominus Deus ergone prosperabitur nonne radices eius evellet et fructum eius distringet et siccabit omnes palmites germinis eius et arescet et non in brachio grandi neque in populo multo ut evelleret eam radicitus.

10 Ecce plantata est ; ergone prosperabitur ? Nonne cum tetigerit eam ventus urens siccabitur, et in areis germinis sui arescet ?

Ecce plantata est ergone prosperabitur nonne cum tetigerit eam ventus urens siccabitur et in areis germinis sui arescet.

11 Et factum est verbum Domini ad me, dicens :

Et factum est verbum Domini ad me dicens.

12 Dic ad domum exasperantem : Nescitis quid ista significent ? Dic : Ecce venit rex Babylonis in Jerusalem ; et assumet regem, et principes ejus, et adducet eos ad semetipsum in Babylonem.

Dic ad domum exasperantem nescitis quid ista significent dic ecce venit rex Babylonis Hierusalem et adsumet regem et principes eius et adducet eos ad semet ipsum in Babylonem.

13 Et tollet de semine regni, ferietque cum eo fœdus ; et ab eo accipiet jusjurandum ; sed et fortes terræ tollet,

Et tollet de semine regni ferietque cum eo foedus et accipiet ab eo iusiurandum sed et fortes terrae tollet.

14 Ut sit regnum humile, et non elevetur, sed custodiat pactum ejus, et servet illud.

Ut sit regnum humile et non elevetur sed custodiat pactum eius et servet illud.

15 Qui recedens ab eo misit nuntios ad Ægyptum, ut daret sibi equos, et populum multum. Numquid prosperabitur, vel consequetur salutem qui fecit hæc ? et qui dissolvit pactum, numquid effugiet ?

Qui recedens ab eo misit nuntios ad Aegyptum ut daret sibi equos et populum multum numquid prosperabitur vel consequetur salutem qui fecit haec et qui dissolvit pactum numquid effugiet.

16 Vivo ego, dicit Dominus Deus ; quoniam in loco regis, qui constituit eum regem, cujus fecit irritum juramentum, et solvit pactum, quod habebat cum eo, in medio Babylonis morietur.

Vivo ego dicit Dominus Deus quoniam in loco regis qui constituit eum regem cuius fecit irritum iuramentum et solvit pactum quod habebat cum eo in medio Babylonis morietur.

17 Et non in exercitu grandi, neque in populo multo faciet contra eum Pharao prælium ; in jactu aggeris, et in exstructione vallorum ut interficiat animas multas.

Et non in exercitu grandi neque in populo multo faciet contra eum Pharao proelium in iactu aggeris et in extructione vallorum ut interficiat animas multas.

18 Spreverat enim juramentum ut solveret fœdus, et ecce dedit manum suam ; et cum omnia hæc fecerit, non effugiet.

Spreverat enim iuramentum ut solveret foedus et ecce dedit manum suam et cum omnia haec fecerit non effugiet.

19 Propterea hæc dicit Dominus Deus : Vivo ego, quoniam juramentum, quod sprevit, et fœdus quod prævaricatus est, ponam in caput ejus.

Propterea haec dicit Dominus Deus vivo ego quoniam iuramentum quod sprevit et foedus quod praevaricatus est ponam in caput eius.

20 Et expandam super eum rete meum et comprehendetur in sagena mea ; et adducam eum in Babylonem, et judicabo eum ibi in prævaricatione, qua despexit me,

Et expandam super eum rete meum et conprehendetur sagena mea et adducam eum in Babylonem et iudicabo illum ibi in praevaricatione qua despexit me.

21 Et omnes profugi ejus cum universo agmine suo, gladio cadent ; residui autem in omnem ventum dispergentur ; et scietis quia ego Dominus locutus sum.

Et omnes profugi eius cum universo agmine gladio cadent residui autem in omnem ventum dispergentur et scietis quia ego Dominus locutus sum.

22 Hæc dicit Dominus Deus : Et sumam ego de medulla cedri sublimis, et ponam ; de vertice ramorum ejus tenerum distringam, et plantabo super montem excelsum et eminentem.

Haec dicit Dominus Deus et sumam ego de medulla cedri sublimis et ponam de vertice ramorum eius tenerum distringam et plantabo super montem excelsum et eminentem.

23 In monte sublimi Israel plantabo illud, et erumpet in germen, et faciet fructum, et erit in cedrum magnam ; et habitabunt sub ea omnes volucres, et universum volatile sub umbra frondium ejus nidificabit.

In monte sublimi Israhel plantabo illud et erumpet in germen et faciet fructum et erit in cedrum magnam et habitabunt sub eo omnes volucres universum volatile sub umbra frondium eius nidificabit.

24 Et scient omnia ligna regionis, quia ego Dominus humiliavi lignum sublime, et exaltavi lignum humile ; et siccavi lignum viride, et frondere feci lignum aridum. Ego Dominus locutus sum, et feci.

Et scient omnia ligna regionis quia ego Dominus humiliavi lignum sublime et exaltavi lignum humile et siccavi lignum viride et frondere feci lignum aridum ego Dominus locutus sum et feci.



Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.

spacer 


Aperit