Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Psalmorum n

LIBER I
 

(Versiculus)

22 (In finem, n pro susceptione matutina. Psalmus David.) Deus, Deus meus, respice in me ; quare me dereliquisti ? Longe a salute mea verba delictorum meorum.

Victori pro cervo matutino canticum. Deus Deus meus quare dereliquisti me longe a salute mea verba rugitus mei.

2 Deus meus, clamabo per diem, et non exaudies ; et nocte, et non ad insipientiam mihi.

Deus meus clamabo per diem et non exaudies et nocte nec est silentium mihi.

3 Tu autem in sancto habitas, laus Israel.

Et tu sancte habitator Laus Israhel.

4 In te speraverunt patres nostri ; speraverunt, et liberasti eos.

In te confisi sunt patres nostri confisi sunt et salvasti eos.

5 Ad te clamaverunt, et salvi facti sunt ; in te speraverunt, et non sunt confusi.

Ad te clamaverunt et salvati sunt in te confisi sunt et non sunt confusi.

6 Ego autem sum vermis, et non homo ; opprobrium hominum, et abjectio plebis.

Ego autem sum vermis et non homo obprobrium hominum et dispectio plebis.

7 Omnes videntes me deriserunt me ; locuti sunt labiis, et moverunt caput.

Omnes videntes me subsannant me dimittunt labium movent caput.

8 Speravit in Domino, eripiat eum ; salvum faciat eum, quoniam vult eum.

Confugit ad Dominum salvet eum liberet eum quoniam vult eum.

9 Quoniam tu es qui extraxisti me de ventre, spes mea ab uberibus matris meæ.

Tu autem propugnator meus ex utero fiducia mea ab uberibus matris meae.

10 In te projectus sum ex utero ; de ventre matris meæ Deus meus es tu ;

In te proiectus sum ex vulva de ventre matris meae Deus meus es tu.

11 Ne discesseris a me, quoniam tribulatio proxima est, quoniam non est qui adjuvet.

Ne longe fias a me quoniam tribulatio proxima est quoniam non est adiutor.

12 Circumdederunt me vituli multi ; tauri pingues obsederunt me.

Circumdederunt me vituli multi tauri pingues vallaverunt me.

13 Aperuerunt super me os suum, sicut leo rapiens et rugiens.

Aperuerunt super me os suum quasi leo capiens et rugiens.

14 Sicut aqua effusus sum ; et dispersa sunt omnia ossa mea. Factum est cor meum tanquam cera liquescens in medio ventris mei.

Sicut aqua effusus sum et separata sunt omnia ossa mea factum est cor meum sicut cera liquefacta in medio ventris mei.

15 Aruit tanquam testa virtus mea, et lingua mea adhæsit faucibus meis, et in pulverem mortis deduxisti me.

Aruit velut testa fortitudo mea et lingua mea adhesit palato meo et in pulverem mortis detraxisti me.

16 Quoniam circumdederunt me canes multi ; concilium malignantium obsedit me. Foderunt manus meas et pedes meos,

Circumdederunt me venatores concilium pessimorum vallavit me vinxerunt manus meas et pedes meos.

17 Dinumeraverunt omnia ossa mea. Ipsi vero consideraverunt et inspexerunt me ;

Numeravi omnia ossa mea quae ipsi respicientes viderunt in me.

18 Diviserunt sibi vestimenta mea, et super vestem meam miserunt sortem.

Diviserunt vestimenta mea sibi et super vestimentum meum miserunt sortem.

19 Tu autem, Domine, ne elongaveris auxilium tuum a me ; ad defensionem meam conspice.

Tu autem Domine ne longe fias fortitudo mea in auxilium meum festina.

20 Erue a framea, Deus, animam meam, et de manu canis tunicam meam.

Erue a gladio animam meam de manu canis solitariam meam.

21 Salva me ex ore leonis, et a cornibus unicornium humilitatem meam.

Salva me ex ore leonis et de cornibus unicornium exaudi me.

22 Narrabo nomen tuum fratribus meis ; in medio ecclesiæ laudabo te.

Narrabo nomen tuum fratribus meis in medio ecclesiae laudabo te.

23 Qui timetis Dominum, laudate eum ; universum semen Jacob, glorificate eum.

Qui timetis Dominum laudate eum omne semen Iacob glorificate eum.

24 Timeat eum omne semen Israel, quoniam non sprevit, neque despexit deprecationem pauperis ; nec avertit faciem suam a me, et cum clamarem ad eum exaudivit me.

Et metuite eum universum semen Israhel quoniam non dispexit neque contempsit modestiam pauperis et non abscondit faciem suam ab eo et cum clamaret ad eum audivit.

25 Apud te laus mea in ecclesia magna ; vota mea reddam in conspectu timentium eum.

Apud te laus mea in ecclesia multa vota mea reddam in conspectu timentium eum.

26 Edent pauperes, et saturabuntur ; et laudabunt Dominum qui requirunt eum ; vivent corda eorum in seculum seculi.

Comedent mites et saturabuntur laudabunt Dominum quaerentes eum vivet cor vestrum in sempiternum.

27 Reminiscentur et convertentur ad Dominum universi fines terræ ; et adorabunt in conspectu ejus universæ familiæ gentium :

Recordabuntur et convertentur ad Dominum omnes fines terrae et adorabunt coram eo universae cognationes gentium.

28 Quoniam Domini est regnum, et ipse dominabitur gentium.

Quia Domini est regnum et dominabitur gentibus.

29 Manducaverunt et adoraverunt omnes pingues terræ ; in conspectu ejus cadent omnes qui descendunt in terram.

Comederunt et adoraverunt omnes pingues terrae ante faciem eius curvabunt genu universi qui descendunt in pulverem.

30 Et anima mea illi vivet ; et semen meum serviet ipsi.

Et anima eius ipsi vivet semen serviet ei.

31 Annuntiabitur Domino generatio ventura ; et annuntiabunt cæli justitiam ejus populo qui nascetur, quem fecit Dominus.

Narrabitur Domino in generatione venient et adnuntiabunt iustitias eius populo qui nascetur quas fecit.



Hieronymus Vulgata - Vide psalmum 21. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 21. || Nova Vulgata Bibliorum Sacrorum Editio.

spacer 


Aperit