111 (Alleluja.) Confitebor tibi, Domine, in toto corde meo in consilio justorum, et congregatione.
Alleluia. Aleph confitebor Domino in toto corde beth in consilio iustorum et congregatione.
2 Magna opera Domini, exquisita in omnes voluntates ejus.
Gimel magna opera Domini deleth exquirenda in cunctis voluntatibus suis.
3 Confessio et magnificentia opus ejus ; et justitia ejus manet in seculum seculi.
He gloria et decor opus eius vav et iustitia eius perseverans semper.
4 Memoriam fecit mirabilium suorum, misericors et miserator Dominus ;
Zai memoriam fecit mirabilium suorum heth clemens et misericors Dominus.
5 Escam dedit timentibus se. Memor erit in seculum testamenti sui ;
Teth escam dedit timentibus se ioth memor erit in sempiternum pacti sui.
6 Virtutem operum suorum annuntiabit populo suo,
Caph fortitudinem operum suorum adnuntiabit populo suo.
7 Ut det illis hæreditatem gentium. Opera manuum ejus veritas et judicium.
Lameth ut det eis hereditatem gentium mem opus manuum eius veritas et iudicium.
8 Fidelia omnia mandata ejus, confirmata in seculum seculi, facta in veritate et æquitate.
Nun fidelia omnia praecepta eius samech firmata in sempiternum iugiter ain facta in veritate et aequitate.
9 Redemptionem misit populo suo ; mandavit in æternum testamentum suum. Sanctum et terribile nomen ejus.
Fe redemptionem misit populo suo sade mandavit in aeternum pactum suum coph sanctum et terribile nomen eius.
10 Initium sapientiæ timor Domini. Intellectus bonus omnibus facientibus eum. Laudatio ejus manet in seculum seculi.
Res principium sapientiae timor Domini sen doctrina bona cunctis qui faciunt ea thau laus eius perseverans iugiter alleluia.
Hieronymus Vulgata - Vide psalmum 110. (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org - Vide psalmum 110. || Nova Vulgata Bibliorum Sacrorum Editio.