4 (In finem in carminibus. n Psalmus David.) Cum invocarem exaudivit me Deus justitiæ meæ ; in tribulatione dilatasti mihi. Miserere mei, et exaudi orationem meam.
Victori in psalmis canticum David. Invocante me exaudi me Deus iustitiae meae in tribulatione dilatasti mihi miserere mei et exaudi orationem meam.
2 Filii hominum, usquequo gravi corde ? ut quid diligitis vanitatem, et quæritis mendacium ?
Filii viri usquequo incliti mei ignominiose diligitis vanitatem quaerentes mendacium semper.
3 Et scitote quoniam mirificavit Dominus sanctum suum ; Dominus exaudiet me cum clamavero ad eum.
Et cognoscite quoniam mirabilem reddidit Dominus sanctum suum Dominus exaudiet cum clamavero ad eum.
4 Irascimini, et nolite peccare ; quæ dicitis in cordibus vestris, in cubilibus vestris compungimini.
Irascimini et nolite peccare loquimini in cordibus vestris super cubilia vestra et tacete semper.
5 Sacrificate sacrificium justitiæ, et sperate in Domino. Multi dicunt : Quis ostendit nobis bona ?
Sacrificate sacrificium iustitiae et fidite in Domino multi dicunt quis ostendit nobis bonum.
6 Signatum est super nos lumen vultus tui, Domine ; dedisti lætitiam in corde meo.
Leva super nos lucem vultus tui Domine dedisti laetitiam in corde meo.
7 A fructu frumenti, vini, et olei sui, multiplicati sunt.
In tempore frumentum et vinum eorum multiplicata sunt.
8 In pace in idipsum dormiam, et requiescam ; quoniam tu, Domine, singulariter in spe constituisti me.
In pace simul requiescam et dormiam. Quia tu Domine specialiter securum habitare fecisti me.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.