25 Verbum, quod factum est ad Jeremiam de omni populo Juda in anno quarto Joakim filii Josiæ regis Juda, (ipse est annus primus Nabuchodonosor regis Babylonis.)
Verbum quod factum est ad Hieremiam de omni populo Iudae in anno quarto Ioachim filii Iosiae regis Iuda ipse est annus primus Nabuchodonosor regis Babylonis.
2 Quod locutus est Jeremias propheta ad omnem populum Juda, et ad universos habitatores Jerusalem, dicens :
Quae locutus est Hieremias propheta ad omnem populum Iuda et ad universos habitatores Hierusalem dicens.
3 A tertio decimo anno Josiæ filii Amon regis Juda usque ad diem hanc ; iste tertius et vigesimus annus, factum est verbum Domini ad me, et locutus sum ad vos de nocte consurgens, et loquens ; et non audistis.
A tertiodecimo anno Iosiae filii Amon regis Iuda usque ad diem hanc iste est tertius et vicesimus annus factum est verbum Domini ad me et locutus sum ad vos de nocte consurgens et loquens et non audistis.
4 Et misit Dominus ad vos omnes servos suos prophetas, consurgens diluculo, mittensque ; et non audistis, neque inclinastis aures vestras ut audiretis.
Et misit Dominus ad vos omnes servos suos prophetas consurgens diluculo mittensque et non audistis neque inclinastis aures vestras ut audiretis.
5 Cum diceret : Revertimini unusquisque a via sua mala, et a pessimis cogitationibus vestris ; et habitabitis in terra, quam dedit Dominus vobis, et patribus vestris, a sæculo et usque in sæculum.
Cum diceret revertimini unusquisque a via sua mala et a pessimis cogitationibus vestris et habitabitis in terram quam dedit Dominus vobis et patribus vestris a saeculo et usque in saeculum.
6 Et nolite ire post deos alienos ut serviatis eis, adoretisque eos ; neque me ad iracundiam provocetis in operibus manuum vestrarum, et non affligam vos.
Et nolite ire post deos alienos ut serviatis eis adoretisque eos neque me ad iracundiam provocetis in operibus manuum vestrarum et non adfligam vos.
7 Et non audistis me, dicit Dominus, ut me ad iracundiam provocaretis in operibus manuum vestrarum in malum vestrum.
Et non audistis me dicit Dominus ut me ad iracundiam provocaretis in operibus manuum vestrarum in malum vestrum.
8 Propterea hæc dicit Dominus exercituum : Pro eo quod non audistis verba mea :
Propterea haec dicit Dominus exercituum pro eo quod non audistis verba mea.
9 Ecce ego mittam, et assumam universas cognationes aquilonis, ait Dominus, et Nabuchodonosor regem Babylonis servum meum ; et adducam eos super terram istam, et super habitatores ejus, et super omnes nationes, quæ in circuitu illius sunt ; et interficiam eos, et ponam eos in stuporem et in sibilum, et in solitudines sempiternas.
Ecce ego mittam et adsumam universas cognationes aquilonis ait Dominus et ad Nabuchodonosor regem Babylonis servum meum et adducam eos super terram istam et super habitatores eius et super omnes nationes quae in circuitu illius sunt et interficiam eos et ponam eos in stuporem et in sibilum et in solitudines sempiternas.
10 Perdamque ex eis vocem gaudii et vocem lætitiæ, vocem sponsi, et vocem sponsæ, vocem molæ, et lumen lucernæ.
Perdamque ex eis vocem gaudii et vocem laetitiae vocem sponsae et vocem sponsi vocem molae et lumen lucernae.
11 Et erit universa terra hæc in solitudinem, et in stuporem ; et servient omnes gentes istæ regi Babylonis septuaginta annis.
Et erit universa terra eius in solitudinem et in stuporem et servient omnes gentes istae regi Babylonis septuaginta annis.
12 Cumque impleti fuerint septuaginta anni, visitabo super regem Babylonis, et super gentem illam, dicit Dominus, iniquitatem eorum, et super terram Chaldæorum ; et ponam illam in solitudines sempiternas.
Cumque impleti fuerint anni septuaginta visitabo super regem Babylonis et super gentem illam dicit Dominus iniquitatem eorum et super terram Chaldeorum et ponam illam in solitudines sempiternas.
13 Et adducam super terram illam omnia verba mea, quæ locutus sum contra eam, omne quod scriptum est in libro isto, quæcumque prophetavit Jeremias adversum omnes gentes.
Et adducam super terram illam omnia verba mea quae locutus sum contra eam omne quod scriptum est in libro isto quaecumque prophetavit Hieremias adversum omnes gentes.
14 Quia servierunt eis, cum essent gentes multæ, et reges magni ; et reddam eis secundum opera eorum, et secundum facta manuum suarum.
Quia servierunt eis cum essent gentes multae et reges magni et reddam eis secundum opera eorum et secundum facta manuum suarum.
15 Quia sic dicit Dominus exercituum Deus Israel : Sume calicem vini furoris hujus de manu mea ; et propinabis de illo cunctis gentibus, ad quas ego mittam te.
Quia sic dicit Dominus exercituum Deus Israhel sume calicem vini furoris huius de manu mea et propinabis de illo cunctis gentibus ad quas ego mittam te.
16 Et bibent, et turbabuntur, et insanient a facie gladii, quem ego mittam inter eos.
Et bibent et turbabuntur et insanient a facie gladii quem ego mittam inter eos.
17 Et accepi calicem de manu Domini, et propinavi cunctis gentibus, ad quas misit me Dominus ;
Et accepi calicem de manu Domini et propinavi cunctis gentibus ad quas misit me Dominus.
18 Jerusalem, et civitatibus Juda, et regibus ejus, et principibus ejus ; ut darem eos in solitudinem, et in stuporem, et in sibilum, et in maledictionem, sicut est dies ista ;
Hierusalem et civitatibus Iudae et regibus eius et principibus eius ut darem eos in solitudinem et in stuporem in sibilum et in maledictionem sicut est dies ista.
19 Pharaoni regi Ægypti, et servis ejus ; et principibus ejus, et omni populo ejus.
Pharaoni regi Aegypti et servis eius et principibus eius et omni populo eius.
20 Et universis generaliter ; cunctis regibus terræ Ausitidis, et cunctis regibus terræ Philisthiim, et Ascaloni, et Gazæ, et Accaron, et reliquiis Azoti,
Et universis generaliter cunctis regibus terrae Ausitidis et cunctis regibus terrae Philisthim et Ascaloni et Gazae et Accaroni et reliquiis Azoti.
21 Et Idumææ, et Moab, et filiis Ammon :
Idumeae et Moab et filiis Ammon.
22 Et cunctis regibus Tyri, et universis regibus Sidonis ; et regibus terræ insularum, qui sunt trans mare.
Et cunctis regibus Tyri et cunctis regibus Sidonis et regibus terrae insularum qui sunt trans mare.
23 Et Dedan, et Thema, et Buz, et universis qui attonsi sunt in comam.
Et Dedan et Theman et Buz et universis qui adtonsi sunt in comam.
24 Et cunctis regibus Arabiæ, et cunctis regibus occidentis, qui habitant in deserto.
Et cunctis regibus Arabiae et cunctis regibus occidentis qui habitant in deserto.
25 Et cunctis regibus Zambri, et cunctis regibus Elam, et cunctis regibus Medorum :
Et cunctis regibus Zambri et cunctis regibus Aelam et cunctis regibus Medorum.
26 Cunctis quoque regibus aquilonis de prope et de longe, unicuique contra fratrem suum ; et omnibus regnis terræ, quæ super faciem ejus sunt ; et rex Sesach bibet post eos ;
Et cunctis regibus aquilonis de prope et de longe unicuique contra fratrem suum et omnibus regnis terrae quae super faciem eius sunt et rex Sesach bibet post eos.
27 Et dices ad eos : Hæc dicit Dominus exercituum Deus Israel : Bibite, et inebriamini, et vomite ; et cadite, neque surgatis a facie gladii, quem ego mittam inter vos.
Et dices ad eos haec dicit Dominus exercituum Deus Israhel bibite et inebriamini et vomite et cadite neque surgatis a facie gladii quem ego mittam inter vos.
28 Cumque noluerint accipere calicem de manu tua ut bibant, dices ad eos : Hæc dicit Dominus exercituum : Bibentes bibetis ;
Cumque noluerint accipere calicem de manu ut bibant dices ad eos haec dicit Dominus exercituum bibentes bibetis.
29 Quia ecce in civitate, in qua invocatum est nomen meum, ego incipiam affligere, et vos quasi innocentes et immunes eritis ? non eritis immunes ; gladium enim ego voco super omnes habitatores terræ, dicit Dominus exercituum.
Quia ecce in civitate in qua invocatum est nomen meum ego incipio adfligere et vos quasi innocentes inmunes eritis non eritis inmunes gladium enim ego voco super omnes habitatores terrae dicit Dominus exercituum.
30 Et tu prophetabis ad eos omnia verba hæc, et dices ad illos : Dominus de excelso rugiet, et de habitaculo sancto suo dabit vocem suam ; rugiens rugiet super decorem suum ; celeuma quasi calcantium concinetur adversus omnes habitatores terræ.
Et tu prophetabis ad eos omnia verba haec et dices ad illos Dominus de excelso rugiet et de habitaculo sancto suo dabit vocem suam rugiens rugiet super decorem suum celeuma quasi calcantium concinetur adversus omnes habitatores terrae.
31 Pervenit sonitus usque ad extrema terræ ; quia judicium Domino cum gentibus ; judicatur ipse cum omni carne, impios tradidi gladio, dicit Dominus.
Pervenit sonitus usque ad extrema terrae quia iudicium Domino cum gentibus iudicatur ipse cum omni carne impios tradidit gladio dicit Dominus.
32 Hæc dicit Dominus exercituum : Ecce afflictio egredietur de gente in gentem ; et turbo magnus egredietur a summitatibus terræ.
Haec dicit Dominus exercituum ecce adflictio egredietur de gente in gentem et turbo magnus egredietur a summitatibus terrae.
33 Et erunt interfecti Domini in die illa a summo terræ usque ad summum ejus ; non plangentur, et non colligentur, neque sepelientur ; in sterquilinium super faciem terræ jacebunt.
Et erunt interfecti Domini in die illa a summo terrae usque ad summum eius non plangentur et non colligentur neque sepelientur in sterquilinium super faciem terrae iacebunt.
34 Ululate, pastores, et clamate ; et aspergite vos cinere optimates gregis ; quia completi sunt dies vestri ut interficiamini ; et dissipationes vestræ, et cadetis quasi vasa pretiosa.
Ululate pastores et clamate et aspergite vos cinere optimates gregis quia conpleti sunt dies vestri ut interficiamini et dissipationes vestrae et cadetis quasi vasa pretiosa.
35 Et peribit fuga a pastoribus, et salvatio ab optimatibus gregis.
Et peribit fuga a pastoribus et salvatio ab optimatibus gregis.
36 Vox clamoris pastorum, et ululatus optimatum gregis ; quia vastavit Dominus pascua eorum.
Vox clamoris pastorum et ululatus optimatium gregis quia vastavit Dominus pascuam eorum.
37 Et conticuerunt arva pacis a facie iræ furoris Domini.
Et conticuerunt arva pacis a facie irae furoris Domini.
38 Dereliquit quasi leo umbraculum suum, quia facta est terra eorum in desolationem a facie iræ columbæ, et a facie iræ furoris Domini.
Dereliquit quasi leo umbraculum suum facta est terra eorum in desolationem a facie irae columbae et a facie irae furoris Domini.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.