Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Isaiæ

(Versiculus)

48 Audite hæc, domus Jacob, qui vocamini nomine Israel, et de aquis Juda existis, qui juratis in nomine Domini, et Dei Israel recordamini non in veritate, neque in justitia.

Audite hoc domus Iacob qui vocamini nomine Israhel et de aquis Iuda existis qui iuratis in nomine Domini et Dei Israhel recordamini non in veritate neque in iustitia.

2 De civitate enim sancta vocati sunt, et super Deum Israel constabiliti sunt ; Dominus exercituum nomen ejus.

De civitate enim sancta vocati sunt et super Deum Israhel constabiliti sunt Dominus exercituum nomen eius.

3 Priora ex tunc annuntiavi, et ex ore meo exierunt, et audita feci ea ; repente operatus sum, et venerunt.

Priora ex tunc adnuntiavi et ex ore meo exierunt et audita feci ea repente operatus sum et venerunt.

4 Scivi enim quia durus es tu, et nervus ferreus cervix tua, et frons tua ærea.

Scivi enim quia durus es tu et nervus ferreus cervix tua et frons tua aerea.

5 Prædixi tibi ex tunc ; antequam venirent indicavi tibi, ne forte diceres : Idola mea fecerunt hæc, et sculptilia mea, et conflatilia mandaverunt ista.

Praedixi tibi ex tunc antequam venirent indicavi tibi ne forte diceres idola mea fecerunt haec et sculptilia mea et conflatilia mandaverunt ista.

6 Quæ audisti, vide omnia ; vos autem, num annuntiastis ? Audita feci tibi nova ex tunc, et conservata sunt quæ nescis.

Quae audisti vide omnia vos autem non adnuntiastis audita feci tibi nova ex nunc et conservata quae nescis.

7 Nunc creata sunt, et non ex tunc ; et ante diem, et non audisti ea, ne forte dicas : Ecce ego cognovi ea.

Nunc creata sunt et non ex tunc et ante diem et non audisti ea ne forte dicas ecce cognovi ea.

8 Neque audisti, neque cognovisti, neque ex tunc aperta est auris tua ; scio enim quia prævaricans prævaricaberis, et transgressorem ex utero vocavi te.

Neque audisti neque cognovisti neque ex tunc aperta est auris tua scio enim quia praevaricans praevaricabis et transgressorem ex ventre vocavi te.

9 Propter nomen meum longe faciam furorem meum ; et laude mea infrenabo te, ne intereas.

Propter nomen meum longe faciam furorem meum et laude mea infrenabo te ne intereas.

10 Ecce excoxi te, sed non quasi argentum, elegi te in camino paupertatis.

Ecce excoxi te sed non quasi argentum elegi te in camino paupertatis.

11 Propter me, propter me faciam, ut non blasphemer ; et gloriam meam alteri non dabo.

Propter me propter me faciam ut non blasphemer et gloriam meam alteri non dabo.

12 Audi me Jacob, et Israel quem ego voco ; ego ipse, ego primus, et ego novissimus.

Audi me Iacob et Israhel quem ego voco ego ipse ego primus et ego novissimus.

13 Manus quoque mea fundavit terram, et dextera mea mensa est cœlos ; ego vocabo eos, et stabunt simul.

Manus quoque mea fundavit terram et dextera mea mensa est caelos ego vocabo eos et stabunt simul.

14 Congregamini, omnes vos, et audite : quis de eis annuntiavit hæc ? Dominus dilexit eum, faciet voluntatem suam in Babylone, et brachium suum in Chaldæis.

Congregamini omnes vos et audite quis de eis adnuntiavit haec Dominus dilexit eum faciet voluntatem suam in Babylone et brachium suum in Chaldeis.

15 Ego, ego locutus sum, et vocavi eum ; adduxi eum, et directa est via ejus.

Ego ego locutus sum et vocavi eum adduxi eum et directa est via eius.

16 Accedite ad me, et audite hoc : non a principio in abscondito locutus sum ; ex tempore antequam fieret, ibi eram ; et nunc Dominus Deus misit me, et spiritus ejus.

Accedite ad me et audite hoc non a principio in abscondito locutus sum ex tempore antequam fieret ibi eram et nunc Dominus Deus misit me et spiritus eius.

17 Hæc dicit Dominus redemptor tuus sanctus Israel : Ego Dominus Deus tuus docens te utilia, gubernans te in via, qua ambulas.

Haec dicit Dominus redemptor tuus Sanctus Israhel ego Dominus Deus tuus docens te utilia gubernans te in via qua ambulas.

18 Utinam attendisses mandata mea ; facta fuisset sicut flumen pax tua, et justitia tua sicut gurgites maris ;

Utinam adtendisses mandata mea facta fuisset sicut flumen pax tua et iustitia tua sicut gurgites maris.

19 Et fuisset quasi arena semen tuum, et stirps uteri tui ut lapilli ejus : non interisset, et non fuisset attritum nomen ejus a facie mea.

Et fuisset quasi harena semen tuum et stirps uteri tui ut lapilli eius non interisset et non fuisset adtritum nomen eius a facie mea.

20 Egredimini de Babylone, fugite a Chaldæis, in voce exultationis annuntiate ; auditum facite hoc, et efferte illud usque ad extrema terræ. Dicite : Redemit Dominus servum suum Jacob.

Egredimini de Babylone fugite a Chaldeis in voce exultationis adnuntiate auditum facite hoc efferte illud usque ad extrema terrae dicite redemit Dominus servum suum Iacob.

21 Non sitierunt in deserto, cum educeret eos ; aquam de petra produxit eis, et scidit petram, et fluxerunt aquæ.

Non sitierunt in deserto cum educeret eos aquam de petra produxit eis et scidit petram et fluxerunt aquae.

22 Non est pax impiis, dicit Dominus.

Non est pax dicit Dominus impiis.



Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.

spacer 


Aperit