Via - Scriptura Spiritismi Christiani † Antiquus Testamentum

Index generalis |  Principium  | Continue

Vulgatam Clementinam

(Concordantiae biblicae plenae - Hieronymus Vulgata - IntraText Edition) ®
(Editio Lusitana)

Isaiæ

(Versiculus)

41 Taceant ad me insulæ, et gentes mutent fortitudinem ; accedant, et tunc loquantur, simul ad judicium propinquemus.

Taceant ad me insulae et gentes mutent fortitudinem accedant et tunc loquantur simul ad iudicium propinquemus.

2 Quis suscitavit ab Oriente justum, vocavit eum ut sequeretur se ? dabit in conspectu ejus gentes, et reges obtinebit ; dabit quasi pulverem gladio ejus, sicut stipulam vento raptam arcui ejus.

Quis suscitavit ab oriente iustum vocavit eum ut sequeretur se dabit in conspectu eius gentes et reges obtinebit dabit quasi pulverem gladio eius sicut stipulam vento raptam arcui eius.

3 Persequetur eos, transibit in pace, semita in pedibus ejus non apparebit.

Persequetur eos transibit in pace semita in pedibus eius non apparebit.

4 Quis hæc operatus est, et fecit, vocans generationes ab exordio ? Ego Dominus, primus et novissimus ego sum.

Quis haec operatus est et fecit vocans generationes ab exordio ego Dominus primus et novissimus ego sum.

5 Viderunt insulæ, et timuerunt, extrema terræ obstupuerunt, appropinquaverunt, et accesserunt.

Viderunt insulae et timuerunt extrema terrae obstipuerunt adpropinquaverunt et accesserunt.

6 Unusquisque proximo suo auxiliabitur, et fratri suo dicet : Confortare.

Unusquisque proximo suo auxiliatur et fratri suo dicit confortare.

7 Confortavit faber ærarius percutiens malleo eum, qui cudebat tunc temporis, dicens : Glutino bonum est ; et confortavit eum clavis, ut non moveretur.

Confortabit faber aerarius percutiens malleo eum qui cudebat tunc temporis dicens glutino bonum est et confortavit eum in clavis ut non moveatur.

8 Et tu Israel serve meus, Jacob quem elegi, semen Abraham amici mei ;

Et tu Israhel serve meus Iacob quem elegi semen Abraham amici mei.

9 In quo apprehendi te ab extremis terræ, et a longinquis ejus vocavi te, et dixi tibi : Servus meus es tu, elegi te, et non abjeci te ;

In quo adprehendi te ab extremis terrae et a longinquis eius vocavi te et dixi tibi servus meus es tu elegi te et non abieci te.

10 Ne timeas, quia ego tecum sum ; ne declines, quia ego Deus tuus ; confortavi te, et auxiliatus sum tibi, et suscepit te dextera justi mei.

Ne timeas quia tecum sum ego ne declines quia ego Deus tuus confortavi te et auxiliatus sum tui et suscepi te dextera iusti mei.

11 Ecce confundentur et erubescent omnes, qui pugnant adversum te ; erunt quasi non sint, et peribunt viri, qui contradicunt tibi.

Ecce confundentur et erubescent omnes qui pugnant adversum te erunt quasi non sint et peribunt viri qui contradicunt tibi.

12 Quæres eos, et non invenies, viros rebelles tuos ; erunt quasi non sint ; et veluti consumptio homines bellantes adversum te.

Quaeres eos et non invenies viros rebelles tuos erunt quasi non sint et veluti consumptio homines bellantes adversum te.

13 Quia ego Dominus Deus tuus, apprehendens manum tuam, dicensque tibi : Ne timeas, ego adjuvi te.

Quia ego Dominus Deus tuus adprehendens manum tuam dicensque tibi ne timeas ego adiuvi te.

14 Noli timere, vermis Jacob, qui mortui estis ex Israel ; ego auxiliatus sum tibi, dicit Dominus : et redemptor tuus sanctus Israel.

Noli timere vermis Iacob qui mortui estis ex Israhel ego auxiliatus sum tui dicit Dominus et redemptor tuus Sanctus Israhel.

15 Ego posui te quasi plaustrum triturans novum, habens rostra serrantia ; triturabis montes, et comminues ; et colles quasi pulverem pones.

Ego posui te quasi plaustrum triturans novum habens rostra serrantia triturabis montes et comminues et colles quasi pulverem pones.

16 Ventilabis eos, et ventus tollet, et turbo disperget eos ; et tu exultabis in Domino, in sancto Israel lætaberis.

Ventilabis eos et ventus tollet et turbo disperget eos et tu exultabis in Domino in Sancto Israhel laetaberis.

17 Egeni et pauperes quærunt aquas, et non sunt ; lingua eorum siti aruit. Ego Dominus exaudiam eos, Deus Israel non derelinquam eos.

Egeni et pauperes quaerunt aquas et non sunt lingua eorum siti aruit ego Dominus exaudiam eos Deus Israhel non derelinquam eos.

18 Aperiam in supinis collibus flumina, et in medio camporum fontes ; ponam desertum in stagna aquarum, et terram inviam in rivos aquarum.

Aperiam in supinis collibus flumina et in medio camporum fontes ponam desertum in stagna aquarum et terram inviam in rivos aquarum.

19 Dabo in solitudinem cedrum, et spinam, et myrtum, et lignum olivæ ; ponam in deserto abietem, ulmum, et buxum simul ;

Dabo in solitudine cedrum et spinam et myrtum et lignum olivae ponam in deserto abietem ulmum et buxum simul.

20 Ut videant, et sciant, et recogitent, et intelligant pariter, quia manus Domini fecit hoc, et sanctus Israel creavit illud.

Ut videant et sciant et recogitent et intellegant pariter quia manus Domini fecit hoc et Sanctus Israhel creavit illud.

21 Prope facite judicium vestrum, dicit Dominus : afferte, si quid forte habetis, dicit rex Jacob.

Prope facite iudicium vestrum dicit Dominus adferte si quid forte habetis dixit Rex Iacob.

22 Accedant, et nuntient nobis quæcumque ventura sunt ; priora quæ fuerunt, nuntiate ; et ponemus cor nostrum, et sciemus novissima eorum, et quæ ventura sunt, indicate nobis.

Accedant et nuntient nobis quaecumque ventura sunt priora quae fuerint nuntiate et ponemus cor nostrum et sciemus novissima eorum et quae ventura sunt indicate nobis.

23 Annuntiate quæ ventura sunt in futurum, et sciemus quia dii estis vos ; bene quoque aut male, si potestis, facite ; et loquamur, et videamus simul.

Adnuntiate quae ventura sunt in futurum et sciemus quia dii estis vos bene quoque aut male si potestis facite et loquamur et videamus simul.

24 Ecce, vos estis ex nihilo, et opus vestrum ex eo, quod non est : abominatio est qui elegit vos.

Ecce vos estis ex nihilo et opus vestrum ex eo quod non est abominatio est qui elegit vos.

25 Suscitavi ab Aquilone, et veniet ab ortu solis ; vocabit nomen meum, et adducet magistratus quasi lutum, et velut plastes conculcans humum.

Suscitavi ab aquilone et venit ab ortu solis vocabit nomen meum et adducet magistratus quasi lutum et velut plastes conculcans humum.

26 Quis annuntiavit ab exordio ut sciamus ; et a principio ut dicamus : Justus es ? non est neque annuntians, neque prædicens, neque audiens sermones vestros.

Quis adnuntiavit ab exordio ut sciamus et a principio ut dicamus iustus es non est neque adnuntians neque praedicens neque audiens sermones vestros.

27 Primus ad Sion dicet : Ecce adsunt, et Jerusalem evangelistam dabo.

Primus ad Sion dicet ecce adsunt et Hierusalem evangelistam dabo.

28 Et vidi, et non erat neque ex istis quisquam qui iniret consilium, et interrogatus responderet verbum.

Et vidi et non erat neque ex istis quisquam qui iniret consilium et interrogatus responderet verbum.

29 Ecce omnes injusti, et vana opera eorum : ventus et inane simulacra eorum.

Ecce omnes iniusti et vana opera eorum ventus et inane simulacra eorum.



Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.

spacer 


Aperit