45 Cumque cœperitis terram dividere sortito, separate primitias Domino, sanctificatum de terra, longitudine viginti quinque millia, et latitudine decem millia ; sanctificatum erit in omni termino ejus per circuitum.
Cumque coeperitis terram dividere sortito separate primitias Domino sanctificatum de terra longitudine viginti quinque milia et latitudine decem milia sanctificatum erit in omni termino eius per circuitum.
2 Et erit ex omni parte sanctificatum quingentos per quingentos, quadrifariam per circuitum, et quinquaginta cubitis in suburbana ejus per gyrum.
Et erit ex omni parte sanctificatum quingentos per quingentos quadrifariam per circuitum et quinquaginta cubitis in suburbana eius per gyrum.
3 Et a mensura ista mensurabis longitudinem viginti quinque millium, et latitudinem decem millium, et in ipso erit templum, sanctumque sanctorum.
Et a mensura ista mensurabis longitudinem viginti quinque milium et latitudinem decem milium et in ipso erit templum sanctumque sanctorum.
4 Sanctificatum de terra erit sacerdotibus ministris sanctuarii, qui accedunt ad ministerium Domini ; et erit eis locus in domos, et in sanctuarium sanctitatis.
Sanctificatum de terra erit sacerdotibus ministris sanctuarii qui accedunt ad ministerium Domini et erit eis locus in domos et in sanctuarium sanctitatis.
5 Vigintiquinque autem millia longitudinis, et decem millia latitudinis erunt levitis, qui ministrant domui ; ipsi possidebunt viginti gazophylacia.
Viginti quinque autem milia longitudinis et decem milia latitudinis erunt Levitis qui ministrant domui ipsi possidebunt viginti gazofilacia.
6 Et possessionem civitatis dabitis quinque millia latitudinis, et longitudinis vigintiquinque millia, secundum separationem sanctuarii, omni domui Israel.
Et possessionem civitatis dabitis quinque milia latitudinis et longitudinis viginti quinque milia secundum separationem sanctuarii omni domui Israhel.
7 Principi quoque hinc et inde in separationem sanctuarii, et in possessionem civitatis, contra faciem separationis sanctuarii, et contra faciem possessionis urbis ; a latere maris usque ad mare, et a latere orientis usque ad orientem : Longitudinis autem juxta unamquamque partem a termino occidentali usque ad terminum orientalem.
Principi quoque hinc et inde in separationem sanctuarii et in possessionem civitatis contra faciem separationis sanctuarii et contra faciem possessionis urbis a latere maris usque ad mare et a latere orientis usque ad orientem longitudinem autem iuxta unamquamque partium a termino occidentali usque ad terminum orientalem.
8 De terra erit ei possessio in Israel ; et non depopulabuntur ultra principes populum meum ; sed terram dabunt domui Israel secundum tribus eorum.
De terra erit ei possessio in Israhel et non depopulabuntur ultra principes populum meum sed terram dabunt domui Israhel secundum tribus eorum.
9 Hæc dicit Dominus Deus : Sufficiat vobis principes Israel ; iniquitatem et rapinas intermittite, et judicium, et justitiam facite, separate confinia vestra a populo meo, ait Dominus Deus.
haec dicit Dominus Deus sufficiat vobis principes Israhel iniquitatem et rapinas intermittite et iudicium et iustitiam facite separate confinia vestra a populo meo ait Dominus Deus.
10 Statera justa, et ephi justum, et batus justus erit vobis.
Statera iusta et oephi iustum et batus iustus erit vobis.
11 Ephi, et batus æqualia, et unius mensuræ erunt ; ut capiat decimam partem cori batus, et decimam partem cori ephi ; juxta mensuram cori erit æqua libratio eorum.
Oephi et batus aequalia et unius mensurae erunt ut capiat decimam partem chori batus et decimam partem chori oephi iuxta mensuram chori erit aequa libratio eorum.
12 Siclus autem viginti obolos habet. Porro viginti sicli, et vigintiquinque sicli, et quindecim sicli, mnam faciunt.
Siclus autem viginti obolos habeat porro viginti sicli et viginti quinque sicli et quindecim sicli minam facient.
13 Et hæc sunt primitiæ, quas tolletis sextam partem ephi de coro frumenti, et sextam partem ephi de coro hordei.
Et haec sunt primitiae quas tolletis sextam partem oephi de choro frumenti et sextam partem oephi de choro hordei.
14 Mensura quoque olei, batus olei, decima pars cori est ; et decem bati corum faciunt ; quia decem bati implent corum.
Mensura quoque olei batus olei decima pars chori est et decem bati chorum faciunt quia decem bati implent chorum.
15 Et arietem unum de grege ducentorum de his, quæ nutriunt Israel in sacrificium, et in holocaustum, et in pacifica, ad expiandum pro eis, ait Dominus Deus.
Et arietem unum de grege ducentorum de his quae nutriunt Israhel in sacrificium et in holocaustum et in pacifica ad expiandum pro eis ait Dominus Deus.
16 Omnis populus terræ tenebitur primitiis his principi in Israel.
Omnis populus terrae tenebitur primitiis his principi in Israhel.
17 Et super principem erunt holocausta, et sacrificium, et libamina in solemnitatibus, et in calendis, et in sabbatis, et in universis solemnitatibus domus Israel ; ipse faciet pro peccato sacrificium, et holocaustum, et pacifica ad expiandum pro domo Israel.
Et super principem erunt holocausta et sacrificium et libamina in sollemnitatibus et in kalendis et in sabbatis in universis sollemnitatibus domus Israhel ipse faciat pro peccato sacrificium et holocaustum et pacifica ad expiandum pro domo Israhel.
18 Hæc dicit Dominus Deus : In primo mense, una mensis sumes vitulum de armento immaculatum, et expiabis sanctuarium.
Haec dicit Dominus Deus in primo mense una mensis sumes vitulum de armento inmaculatum et expiabis sanctuarium.
19 Et tollet sacerdos de sanguine quod erit pro peccato ; et ponet in postibus domus, et in quatuor angulis crepidinis altaris, et in postibus portæ atrii interioris.
Et tollet sacerdos de sanguine quod erit pro peccato et ponet in postibus domus et in quattuor angulis crepidinis altaris et in postibus portae atrii interioris.
20 Et sic facies in septima mensis pro unoquoque, qui ignoravit, et errore deceptus est, et expiabis pro domo.
Et sic facies in septima mensis pro unoquoque qui ignoravit et errore deceptus est et expiabitis pro domo.
21 In primo mense, quartadecima die mensis, erit vobis paschæ solemnitas : septem diebus azyma comedentur.
In primo mense quartadecima die mensis erit vobis paschae sollemnitas septem diebus azyma comedentur.
22 Et faciet princeps in die illa pro se, et pro universo populo terræ, vitulum pro peccato.
Et faciet princeps in die illa pro se et pro universo populo terrae vitulum pro peccato.
23 Et in septem dierum solemnitate faciet holocaustum Domino septem vitulos, et septem arietes immaculatos quotidie septem diebus ; et pro peccato hircum caprarum quotidie.
Et in septem dierum sollemnitate faciet holocaustum Domino septem vitulos et septem arietes inmaculatos cotidie septem diebus et pro peccato hircum caprarum cotidie.
24 Et sacrificium ephi per vitulum, et ephi per arietem faciet ; et olei hin per singula ephi.
Et sacrificium oephi per vitulum et oephi per arietem faciet et olei hin per singula oephi.
25 Septimo mense, quintadecima die mensis in solemnitate faciet sicut supra dicta sunt per septem dies ; tam pro peccato, quam pro holocausto, et in sacrificio, et in oleo.
Septimo mense quintadecima die mensis in sollemnitate faciet sicut supra dicta sunt per septem dies tam pro peccato quam pro holocausto et in sacrificio et in oleo.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.