37 Facta est super me manus Domini, et eduxit me in spiritu Domini ; et dimisit me in medio campi, qui erat plenus ossibus ;
Facta est super me manus Domini et eduxit me in spiritu Domini et dimisit me in medio campi qui erat plenus ossibus.
2 Et circumduxit me per ea in gyro ; erant autem multa valde super faciem campi, siccaque vehementer.
Et circumduxit me per ea in gyro erant autem multa valde super faciem campi siccaque vehementer.
3 Et dixit ad me : Fili hominis putasne vivent ossa ista ? Et dixi : Domine Deus, tu nosti.
Et dixit ad me fili hominis putasne vivent ossa ista et dixi Domine Deus tu nosti.
4 Et dixit ad me : Vaticinare de ossibus istis ; et dices eis : Ossa arida audite verbum Domini.
Et dixit ad me vaticinare de ossibus istis et dices eis ossa arida audite verbum Domini.
5 Hæc dicit Dominus Deus ossibus his : Ecce ego intromittam in vos spiritum, et vivetis.
Haec dicit Dominus Deus ossibus his ecce ego intromittam in vos spiritum et vivetis.
6 Et dabo super vos nervos, et succrescere faciam super vos carnes, et superextendam in vobis cutem ; et dabo vobis spiritum, et vivetis, et scietis quia ego Dominus.
Et dabo super vos nervos et succrescere faciam super vos carnes et superextendam in vobis cutem et dabo vobis spiritum et vivetis et scietis quia ego Dominus.
7 Et prophetavi sicut præceperat mihi ; factus est autem sonitus, prophetante me, et ecce commotio ; et accesserunt ossa ad ossa, unumquodque ad juncturam suam.
Et prophetavi sicut praeceperat mihi factus est autem sonitus prophetante me et ecce commotio et accesserunt ossa ad ossa unumquodque ad iuncturam suam.
8 Et vidi, et ecce super ea nervi, et carnes ascenderunt ; et extenta est in eis cutis desuper, et spiritum non habebant.
Et vidi et ecce super ea nervi et carnes ascenderunt et extenta est in eis cutis desuper et spiritum non habebant.
9 Et dixit ad me : Vaticinare ad spiritum, vaticinare fili hominis, et dices ad spiritum : Hæc dicit Dominus Deus : A quatuor ventis veni spiritus, et insuffla super interfectos istos, et reviviscant.
Et dixit ad me vaticinare ad spiritum vaticinare fili hominis et dices ad spiritum haec dicit Dominus Deus a quattuor ventis veni spiritus et insufla super interfectos istos et revivescant.
10 Et prophetavi sicut præceperat mihi ; et ingressus est in ea spiritus, et vixerunt ; steteruntque super pedes suos exercitus grandis nimis valde.
Et prophetavi sicut praeceperat mihi et ingressus est in ea spiritus et vixerunt steteruntque super pedes suos exercitus grandis nimis valde.
11 Et dixit ad me : Fili hominis, ossa hæc universa, domus Israel est ; ipsi dicunt : Aruerunt ossa nostra, et periit spes nostra, et abscissi sumus.
Et dixit ad me fili hominis ossa haec universa domus Israhel est ipsi dicunt aruerunt ossa nostra et periit spes nostra et abscisi sumus.
12 Propterea vaticinare, et dices ad eos : Hæc dicit Dominus Deus : Ecce ego aperiam tumulos vestros, et educam vos de sepulchris vestris populus meus ; et inducam vos in terram Israel.
Propterea vaticinare et dices ad eos haec dicit Dominus Deus ecce ego aperiam tumulos vestros et educam vos de sepulchris vestris populus meus et inducam vos in terram Israhel.
13 Et scietis quia ego Dominus, cum aperuero sepulchra vestra, et eduxero vos de tumulis vestris popule meus ;
Et scietis quia ego Dominus cum aperuero sepulchra vestra et eduxero vos de tumulis vestris populus meus.
14 Et dedero spiritum meum in vobis, et vixeritis, et requiescere vos faciam super humum vestram ; et scietis quia ego Dominus locutus sum, et feci, ait Dominus Deus.
Et dedero spiritum meum in vobis et vixeritis et requiescere vos faciam super humum vestram et scietis quia ego Dominus locutus sum et feci ait Dominus Deus.
15 Et factus est sermo Domini ad me, dicens :
Et factus est sermo Domini ad me dicens.
16 Et tu fili hominis sume tibi lignum unum ; et scribe super illud : Judæ, et filiorum Israel sociorum ejus ; et tolle lignum alterum, et scribe super illud : Joseph ligno Ephraim, et cunctæ domui Israel, sociorumque ejus.
Et tu fili hominis sume tibi lignum unum et scribe super illud Iudae et filiorum Israhel sociis eius et tolle lignum alterum et scribe super eum Ioseph lignum Ephraim et cunctae domui Israhel sociorumque eius.
17 Et adjunge illa, unum ad alterum tibi in lignum unum ; et erunt in unionem in manu tua.
Et adiunge illa unum ad alterum tibi in lignum unum et erunt in unionem in manu tua.
18 Cum autem dixerint ad te filii populi tui loquentes : Nonne indicas nobis quid in his tibi velis ?
Cum autem dixerint ad te filii populi tui loquentes nonne indicas nobis quid in his tibi velis.
19 Loqueris ad eos : Hæc dicit Dominus Deus : Ecce ego assumam lignum Joseph, quod est in manu Ephraim, et tribus Israel, quæ sunt ei adjunctæ ; et dabo eas pariter cum ligno Juda, et faciam eas in lignum unum ; et erunt unum in manu ejus.
Loqueris ad eos haec dicit Dominus Deus ecce ego adsumam lignum Ioseph quod est in manu Ephraim et tribus Israhel quae iunctae sunt ei et dabo eas pariter cum ligno Iuda et faciam eas in lignum unum et erunt unum in manu eius.
20 Erunt autem ligna, super quæ scripseris in manu tua, in oculis eorum.
Erunt autem ligna super quae scripseris in manu tua in oculis eorum.
21 Et dices ad eos : Hæc dicit Dominus Deus : Ecce ego assumam filios Israel de medio nationum, ad quas abierunt ; et congregabo eos undique, et adducam eos ad humum suam.
Et dices ad eos haec dicit Dominus Deus ecce ego adsumam filios Israhel de medio nationum ad quas abierunt et congregabo eos undique et adducam eos ad humum suam.
22 Et faciam eos in gentem unam in terra in montibus Israel, et rex unus erit omnibus imperans ; et non erunt ultra duæ gentes, nec dividentur amplius in duo regna.
Et faciam eos gentem unam in terra in montibus Israhel et rex unus erit omnibus imperans et non erunt ultra duae gentes nec dividentur amplius in duo regna.
23 Neque polluentur ultra in idolis suis et abominationibus suis, et cunctis iniquitatibus suis ; et salvos eos faciam de universis sedibus, in quibus peccaverunt, et emundabo eos ; et erunt mihi populus, et ego ero eis Deus.
Neque polluentur ultra in idolis suis et abominationibus suis et in cunctis iniquitatibus suis et salvos eos faciam de universis sedibus suis in quibus peccaverunt et mundabo eos et erunt mihi populus et ego ero eis Deus.
24 Et servus meus David rex super eos, et pastor unus erit omnium eorum ; in judiciis meis ambulabunt, et mandata mea custodient, et facient ea.
Et servus meus David rex super eos et pastor unus erit omnium eorum in iudiciis meis ambulabunt et mandata mea custodient et facient ea.
25 Et habitabunt super terram, quam dedi servo meo Jacob, in qua habitaverunt patres vestri ; et habitabunt super eam ipsi, et filii eorum, et filii filiorum eorum, usque in sempiternum ; et David servus meus princeps eorum in perpetuum.
Et habitabunt super terram quam dedi servo meo Iacob in qua habitaverunt patres vestri et habitabunt super eam ipsi et filii eorum et filii filiorum eorum usque in sempiternum et David servus meus princeps eorum in perpetuum.
26 Et percutiam illis fœdus pacis, pactum sempiternum erit eis ; et fundabo eos, et multiplicabo, et dabo sanctificationem meam in medio eorum in perpetuum.
Et percutiam illis foedus pacis pactum sempiternum erit eis et fundabo eos et multiplicabo et dabo sanctificationem meam in medio eorum in perpetuum.
27 Et erit tabernaculum meum in eis ; et ero eis Deus, et ipsi erunt mihi populus.
Et erit tabernaculum meum in eis et ero eis Deus et ipsi erunt mihi populus.
28 Et scient gentes quia ego Dominus sanctificator Israel, cum fuerit sanctificatio mea in medio eorum in perpetuum.
Et scient gentes quia ego Dominus sanctificator Israhel cum fuerit sanctificatio mea in medio eorum in perpetuum.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.