12 Memento Creatoris tui in diebus juventutis tuæ, antequam veniat tempus afflictionis, et appropinquent anni de quibus dicas : Non mihi placent ;
Memento creatoris tui in diebus iuventutis tuae antequam veniat tempus adflictionis et adpropinquent anni de quibus dicas non mihi placent.
2 Antequam tenebrescat sol, et lumen, et luna, et stellæ, et revertantur nubes post pluviam ;
Antequam tenebrescat sol et lumen et luna et stellae et revertantur nubes post pluviam.
3 Quando commovebuntur custodes domus, et nutabunt viri fortissimi, et otiosæ erunt molentes in minuto numero, et tenebrescent videntes per foramina ;
Quando commovebuntur custodes domus et nutabuntur viri fortissimi et otiosae erunt molentes inminuto numero et tenebrescent videntes per foramina.
4 Et claudent ostia in platea, in humilitate vocis molentis, et consurgent ad vocem volucris, et obsurdescent omnes filiæ carminis.
Et claudent ostia in platea in humilitate vocis molentis et consurgent ad vocem volucris et obsurdescent omnes filiae carminis.
5 Excelsa quoque timebunt, et formidabunt in via ; florebit amygdalus, impinguabitur locusta, et dissipabitur capparis, quoniam ibit homo in domum æternitatis suæ, et circuibunt in platea plangentes.
Excelsa quoque timebunt et formidabunt in via florebit amigdalum inpinguabitur lucusta et dissipabitur capparis quoniam ibit homo in domum aeternitatis suae et circumibunt in platea plangentes.
6 Antequam rumpatur funiculus argenteus, et recurrat vitta aurea, et conteratur hydria super fontem, et confringatur rota super cisternam,
Antequam rumpatur funis argenteus et recurrat vitta aurea et conteratur hydria super fontem et confringatur rota super cisternam.
7 Et revertatur pulvis in terram suam unde erat, et spiritus redeat ad Deum, qui dedit illum.
Eet revertatur pulvis in terram suam unde erat et spiritus redeat ad Deum qui dedit illum.
8 Vanitas vanitatum, dixit Ecclesiastes, et omnia vanitas.
Vanitas vanitatum dixit Ecclesiastes omnia vanitas.
9 Cumque esset sapientissimus Ecclesiastes, docuit populum ; et enarravit quæ fecerat ; et investigans composuit parabolas multas.
Cumque esset sapientissimus Ecclesiastes docuit populum et enarravit quae fecerit et investigans conposuit parabolas multas.
10 Quæsivit verba utilia, et conscripsit sermones rectissimos ac veritate plenos.
Quaesivit verba utilia et conscripsit sermones rectissimos ac veritate plenos.
11 Verba sapientium sicut stimuli, et quasi clavi in altum defixi, quæ per magistrorum consilium data sunt a pastore uno.
Verba sapientium sicut stimuli et quasi clavi in altum defixi quae per magistrorum concilium data sunt a pastore uno.
12 His amplius, fili mi, ne requiras. Faciendi plures libros nullus est finis ; frequensque meditatio carnis afflictio est.
His amplius fili mi ne requiras faciendi plures libros nullus est finis frequensque meditatio carnis adflictio est.
13 Finem loquendi pariter omnes audiamus. DEUM TIME, ET MANDATA EJUS OBSERVA ; HOC EST ENIM OMNIS HOMO ;
Finem loquendi omnes pariter audiamus Deum time et mandata eius observa hoc est enim omnis homo.
14 Et cuncta quæ fiunt adducet Deus in judicium pro omni errato, sive bonum sive malum illud sit.
Et cuncta quae fiunt adducet Deus in iudicium pro omni errato sive bonum sive malum sit.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.