11 Athalia vero, mater Ochoziæ, videns mortuum filium suum, surrexit, et interfecit omne semen regium.
Athalia vero mater Ahaziae videns mortuum filium suum surrexit et interfecit omne semen regium.
2 Tollens autem Josaba, filia regis Joram, soror Ochoziæ, Joas, filium Ochoziæ, furata est eum de medio filiorum regis qui interficiebantur, et nutricem ejus de triclinio ; et abscondit eum a facie Athaliæ ut non interficeretur.
Tollens autem Iosaba filia regis Ioram soror Ahaziae Ioas filium Ahaziae furata est eum de medio filiorum regis qui interficiebantur et nutricem eius de triclinio et abscondit eum a facie Athaliae ut non interficeretur.
3 Eratque cum ea sex annis clam in domo Domini ; porro Athalia regnavit super terram.
Eratque cum ea in domo Domini clam sex annis porro Athalia regnavit super terram.
4 Anno autem septimo misit Joiada, et assumens centuriones et milites introduxit ad se in templum Domini, pepigitque cum eis fœdus ; et, adjurans eos in domo Domini, ostendit eis filium regis ;
Anno autem septimo misit Ioiada et adsumens centuriones et milites introduxit ad se in templum Domini pepigitque cum eis foedus et adiurans eos in domo Domini ostendit eis filium regis.
5 Et præcepit illis, dicens : Iste est sermo quem facere debetis :
Et praecepit illis dicens iste sermo quem facere debetis.
6 Tertia pars vestrum introëat sabbato, et observet excubias domus regis ; tertia autem pars sit ad portam Sur ; et tertia pars sit ad portam quæ est post habitaculum scutariorum ; et custodietis excubias domus Messa.
Tertia pars vestrum introeat sabbato et observet excubitum domus regis tertia autem pars sit ad portam Sir et tertia pars ad portam quae est post habitaculum scutariorum et custodietis excubitum domus Messa.
7 Duæ vero partes e vobis, omnes egredientes sabbato, custodiant excubias domus Domini circa regem.
Duae vero partes e vobis omnes egredientes sabbato custodiant excubias domus Domini circum regem.
8 Et vallabitis eum, habentes arma in manibus vestris ; si quis autem ingressus fuerit septum templi, interficiatur ; eritisque cum rege introeunte et egrediente.
Et vallabitis eum habentes arma in manibus vestris si quis autem ingressus fuerit septum templi interficiatur eritisque cum rege introeunte et egrediente.
9 Et fecerunt centuriones juxta omnia quæ præceperat eis Joiada sacerdos ; et assumentes singuli viros suos, qui ingrediebantur sabbato, cum his qui egrediebantur sabbato, venerunt ad Joiadam sacerdotem.
Et fecerunt centuriones iuxta omnia quae praeceperat eis Ioiada sacerdos et adsumentes singuli viros suos qui ingrediebantur sabbatum cum his qui egrediebantur e sabbato venerunt ad Ioiada sacerdotem.
10 Qui dedit eis hastas et arma regis David, quæ erant in domo Domini.
Qui dedit eis hastas et arma regis David quae erant in domo Domini.
11 Et steterunt singuli habentes arma in manu sua, a parte templi dextera usque ad partem sinistram altaris et ædis, circum regem.
Et steterunt singuli habentes arma in manu sua a parte templi dextra usque ad partem sinistram altaris et aedis circum regem.
12 Produxitque filium regis, et posuit super eum diadema et testimonium ; feceruntque eum regem, et unxerunt ; et plaudentes manu, dixerunt : Vivat rex !
Produxitque filium regis et posuit super eum diadema et testimonium feceruntque eum regem et unxerunt et plaudentes manu dixerunt vivat rex.
13 Audivit autem Athalia vocem populi currentis ; et ingressa ad turbas in templum Domini,
Audivit Athalia vocem currentis populi et ingressa ad turbas in templum Domini.
14 Vidit regem stantem super tribunal juxta morem, et cantores, et tubas prope eum, omnemque populum terræ lætantem et canentem tubis, et scidit vestimenta sua, clamavitque : Conjuratio ! conjuratio !
Vidit regem stantem super tribunal iuxta morem et cantores et tubas propter eum omnemque populum terrae laetantem et canentem tubis et scidit vestimenta sua clamavitque coniuratio coniuratio.
15 Præcepit autem Joiada centurionibus qui erant super exercitum, et ait eis : Educite eam extra septa templi ; et quicumque eam secutus fuerit, feriatur gladio. Dixerat enim sacerdos : Non occidatur in templo Domini.
Praecepit autem Ioiada centurionibus qui erant super exercitum et ait eis educite eam extra consepta templi et quicumque secutus eam fuerit feriatur gladio dixerat enim sacerdos non occidatur in templo Domini.
16 Imposueruntque ei manus, et impegerunt eam per viam introitus equorum, juxta palatium ; et interfecta est ibi.
Inposueruntque ei manus et inpegerunt eam per viam introitus equorum iuxta palatium et interfecta est ibi.
17 Pepigit ergo Joiada fœdus inter Dominum, et inter regem et inter populum, ut esset populus Domini, et inter regem et populum.
Pepigit igitur Ioiada foedus inter Dominum et inter regem et inter populum ut esset populus Domini et inter regem et populum.
18 Ingressusque est omnis populus terræ templum Baal, et destruxerunt aras ejus, et imagines contriverunt valide ; Mathan quoque sacerdotem Baal, occiderunt coram altari. Et posuit sacerdos custodias in domo Domini.
Ingressusque est omnis populus terrae templum Baal et destruxerunt aras eius et imagines contriverunt valide Matthan quoque sacerdotem Baal occiderunt coram altari et posuit sacerdos custodias in domo Domini.
19 Tulitque centuriones, et Cerethi et Phelethi legiones, et omnem populum terræ ; deduxeruntque regem de domo Domini, et venerunt per viam portæ scutariorum in palatium ; et sedit super thronum regum.
Tulitque centuriones et Cherethi et Felethi legiones et omnem populum terrae deduxeruntque regem de domo Domini et venerunt per viam portae scutariorum in palatium et sedit super thronum regum.
20 Lætatusque est omnis populus terræ, et civitas conquievit ; Athalia autem occisa est gladio in domo regis.
Laetatusque est omnis populus terrae et civitas conquievit Athalia autem occisa est gladio in domo regis.
21 Septemque annorum erat Joas cum regnare cœpisset.
Septemque annorum erat Ioas cum regnare coepisset.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.