14 Dormivit autem Abia cum patribus suis ; et sepelierunt eum in civitate David ; regnavitque Asa, filius ejus, pro eo ; in cujus diebus quievit terra annis decem.
Dormivit autem Abia cum patribus suis et sepelierunt eum in civitate David regnavitque Asa filius eius pro eo in cuius diebus quievit terra annis decem.
2 Fecit autem Asa quod bonum et placitum erat in conspectu Dei sui ; et subvertit altaria peregrini cultus, et excelsa,
Fecit autem Asa quod bonum et placitum erat in conspectu Dei sui et subvertit altaria peregrini cultus et excelsa.
3 Et confregit statuas, lucosque succidit ;
Et confregit statuas lucosque succidit.
4 Et præcepit Judæ ut quæreret Dominum, Deum patrum suorum, et faceret legem, et universa mandata ;
Ac praecepit Iudae ut quaereret Dominum Deum patrum suorum et faceret legem et universa mandata.
5 Et abstulit de cunctis urbibus Juda aras et fana ; et regnavit in pace.
Et abstulit e cunctis urbibus Iuda aras et fana et regnavit in pace.
6 Ædificavit quoque urbes munitas in Juda, quia quietus erat, et nulla temporibus ejus bella surrexerant, pacem Domino largiente.
Aedificavit quoque urbes munitas in Iuda quia quietus erat et nulla temporibus eius bella surrexerant pacem Domino largiente.
7 Dixit autem Judæ : Ædificemus civitates istas ; et vallemus muris ; et roboremus turribus, et portis, et seris, donec a bellis quieta sunt omnia, eo quod quæsierimus Dominum, Deum patrum nostrorum, et dederit nobis pacem per gyrum. Ædificaverunt igitur, et nullum in exstruendo impedimentum fuit.
Dixit autem Iudae aedificemus civitates istas et vallemus muris et roboremus turribus et portis et seris donec a bellis quieta sunt omnia eo quod quaesierimus Dominum Deum patrum nostrorum et dederit nobis pacem per gyrum aedificaverunt igitur et nullum in extruendo inpedimentum fuit.
8 Habuit autem Asa in exercitu suo portantium scuta et hastas de Juda trecenta millia ; de Benjamin vero scutariorum et saggittariorum ducenta octoginta millia, omnes isti viri fortissimi.
Habuit autem Asa in exercitu suo portantium scuta et hastas de Iuda trecenta milia de Beniamin vero scutariorum et sagittariorum ducenta octoginta milia omnes isti viri fortissimi.
9 Egressus est autem contra eos Zara Æthiops cum exercitu suo decies centena millia, et curribus trecentis, et venit usque Maresa.
Egressus est autem contra eos Zara Aethiops cum exercitu decies centena milia et curribus trecentis et venit usque Maresa.
10 Porro Asa perrexit obviam ei, et instruxit aciem ad bellum in valle Sephata, quæ est juxta Maresa ;
Porro Asa perrexit obviam et instruxit aciem ad bellum in valle Sephata quae est iuxta Maresa.
11 Et invocavit Dominum Deum, et ait : Domine, non est apud te ulla distantia, utrum in paucis auxilieris, an in pluribus ; adjuva nos, Domine Deus noster ; in te enim, et in tuo nomine habentes fiduciam, venimus contra hanc multitudinem. Domine, Deus noster tu es ; non prævaleat contra te homo.
Et invocavit Dominum Deum et ait Domine non est apud te ulla distantia utrum in paucis auxilieris an in pluribus adiuva nos Domine Deus noster in te enim et in tuo nomine habentes fiduciam venimus contra hanc multitudinem Domine Deus noster tu es non praevaleat contra te homo.
12 Exterruit itaque Dominus Æthiopes coram Asa et Juda ; fugeruntque Æthiopes.
Exterruit itaque Dominus Aethiopas coram Asa et Iuda fugeruntque Aethiopes.
13 Et persecutus est eos Asa, et populus qui cum eo erat, usque Gerara ; et ruerunt Æthiopes usque ad internecionem, quia Domino cædente contriti sunt, et exercitu illius præliante. Tulerunt ergo spolia multa,
Et persecutus est eos Asa et populus qui cum eo erat usque Gerar et ruerunt Aethiopes usque ad internicionem quia Domino caedente contriti sunt et exercitu illius proeliante tulerunt ergo spolia multa.
14 Et percusserunt civitates omnes per circuitum Geraræ, grandis quippe cunctos terror invaserat ; et diripuerunt urbes, et multam prædam asportaverunt.
Et percusserunt omnes civitates per circuitum Gerare grandis quippe cunctos terror invaserat et diripuerunt urbes et multam praedam asportaverunt.
15 Sed et caulas ovium destruentes, tulerunt pecorum infinitam multitudinem et camelorum, reversique sunt in Jerusalem.
Sed et caulas ovium destruentes tulerunt pecorum infinitam multitudinem et camelorum reversique sunt Hierusalem.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org || Nova Vulgata Bibliorum Sacrorum Editio.